ابوظہبی کے ولی عہد آج اپنے پہلے سرکاری دورے پر پاکستان آئیں گے۔
ترجمان دفترخارجہ شفقت علی خان کے مطابق ابوظہبی کے ولی عہد دورہ وزیر اعظم شہباز شریف کی دعوت پر کر رہے ہیں، ابوظہبی کے ولی عہد کے ہمراہ وزرا، سینئر حکام اور کاروباری شخصیات آئیں گی۔
دورے کے دوران، ابوظہبی کے ولی عہد پاکستان کی قیادت سے وسیع تبادلہ خیال کریں گے،ملاقاتوں میں باہمی دلچسپی کے امور، تاریخی تعلقات کے استحکام اور اقتصادی و سرمایہ کاری تعاون کو فروغ دینے پر توجہ دی جائے گی۔
دورے کے دوران کئی معاہدوں اور مفاہمتی یادداشتوں پر دستخط کیے جائیں گے،یہ معاہدے اور مفاہمتی یادداشتیں طویل المدتی تعاون کے لیے پہلے سے موجود مضبوط فریم ورک کو مزید مستحکم کریں گے۔
انہوں نے مزید کہا کہ دورہ پاکستان اور یواے ای کے درمیان گہرے برادرانہ تعلقات کی عکاسی کرتا ہے۔
