دنیا بھر میں مقبول اورسب سے زیادہ پسندیدہ اینی میٹڈ شو دی سمسن میں متعدد اہم حالات و واقعات کی پیش گوئیاں کی گئی ہیں۔
اس اینی میٹڈ ٹی وی شو میں ٹرمپ کے برسر اقتدار آنے اور نائن الیون سمیت دنیا میں رونما ہونے والے متعدد اہم واقعات کی پیش گوئی کی گئی ہے، یہ کارٹون سیریز 1989 میں شروع کی گئی تھی جو کہ تقریباً 30 برسوں سے جاری ہے اور اس کے 34 سیزن نشر ہوچکے ہیں۔
حال ہی میں میٹا کے مالک مارک زکر برگ کی جانب سے نئی ایپ ’تھریڈز‘ لانچ کی گئی جس نے آتے ہی ٹوئٹر کے لیے خطرے کی گھنٹی بجادی اور پھر اس کے متعارف ہوتے ہی اسے جو پذیرائی ملی اس کی مثال نہیں ملتی۔
تاہم اب سوشل میڈیا کی متعدد پوسٹس میں دعویٰ کیا جا رہا ہے کہ ’تھریڈز‘ ایپ کی سمسن کارٹون میں پہلے ہی پیشگوئی کی جاچکی ہے۔
دی سمسن اور میٹا کی نئی ایپ سے متعلق ٹوئٹر پر متعدد پوسٹس زیرگردش ہیں جن میں دعویٰ کیا جا رہا ہے کہ معروف امریکی کارٹون سیریز، سمسن میں ’تھریڈز‘ کی بھی پیش گوئی کی گئی تھی۔
اس دعوے سے متعلق سمسن کارٹون کی حالیہ قسط میں اس کارٹون کے مرکزی کردار ’ہومر‘ کی ایک تصویرسوشل میڈیا پر وائرل ہے جس میں اس کے کان پر میٹا کی نئی ایپ ’تھریڈز‘ کا لوگو بنا ہوا ہے۔
ہومرکی اس تصویر سے متعلق دعویٰ کیا جا رہا ہے کہ سمسن سیریز میں تھریڈز کے حوالے سے بھی دکھایا جا چکا ہے لیکن درحقیقت ایسا کچھ نہیں ہے،یہ تصویر ترمیم شدہ ہے جسے سوشل میڈیا پر وائرل کیا گیا۔
