امریکی صدر ڈونلڈ ٹرمپ نے حماس پر زور دیا ہے کہ وہ اسرائیل کے ساتھ 60 روزہ جنگ بندی کی امریکی تجویز قبول کرے، جو قطر اور مصر کے ذریعے پہنچائی جائے گی۔ ان کے مطابق اسرائیل اس تجویز پر رضامند ہو چکا ہے اور یہ فریقین کے درمیان جنگ کے خاتمے کی راہ ہموار کر سکتی ہے۔
ٹرمپ نے خبردار کیا کہ حماس کے لیے یہ “آخری اور بہترین موقع” ہے، کیونکہ آئندہ حالات مزید خراب ہو سکتے ہیں۔
یہ بیان ایک ایسے وقت سامنے آیا ہے جب امریکہ اور اسرائیل ایران کے جوہری تنصیبات پر حملوں کے بعد حاصل ہونے والی سفارتی برتری کو استعمال کرتے ہوئے غزہ میں جنگ بندی کی کوشش کر رہے ہیں۔
امریکی تجویز میں حماس کی جانب سے آدھے یرغمالیوں کی رہائی کے بدلے فلسطینی قیدیوں اور باقیات کی حوالگی شامل ہے۔ اسرائیل اور حماس اب بھی اپنے سخت مؤقف پر قائم ہیں؛ اسرائیل حماس کے مکمل خاتمے پر اصرار کر رہا ہے، جبکہ حماس ہتھیار ڈالنے سے انکاری ہے۔
غزہ میں جاری اسرائیلی حملوں کے باعث اب تک 56,000 سے زائد فلسطینی جاں بحق ہو چکے ہیں، جب کہ عالمی عدالتوں میں اسرائیل پر نسل کشی اور جنگی جرائم کے الزامات زیر سماعت ہیں، جنہیں اسرائیل مسترد کرتا ہے۔
