ایران نے اعلان کیا ہے کہ وہ منگل کے روز تہران میں چین اور روس کے ساتھ جوہری پروگرام پر اعلیٰ سطحی مذاکرات کرے گا۔ ایرانی وزارتِ خارجہ کے ترجمان اسماعیل بقائی کے مطابق، یہ تین طرفہ مشاورت پابندیوں کے خدشات اور جوہری پیش رفت پر مرکوز ہو گی۔ انہوں نے مغربی ممالک پر 2015 کے جوہری معاہدے کی خلاف ورزی کا الزام عائد کیا۔
دوسری جانب، برطانیہ، فرانس اور جرمنی نے ایران کو خبردار کیا ہے کہ اگر وہ مذاکرات میں واپس نہ آیا تو دوبارہ پابندیاں لگ سکتی ہیں۔ ایران نے یورپی ممالک کی درخواست پر جمعہ کو استنبول میں مذاکرات پر آمادگی ظاہر کر دی ہے۔
ادھر روسی صدر پیوٹن نے کریملن میں ایرانی رہنما کے مشیر علی لاریجانی سے ملاقات کی، جس میں مشرق وسطیٰ کی کشیدگی اور جوہری امور پر بات چیت ہوئی۔ پیوٹن نے سیاسی حل اور خطے کے استحکام کی حمایت کا اعادہ کیا۔
