کلونجی کی افادیت کو احادیثِ نبوی ﷺ سے تصدیق حاصل ہے۔ یہ چھوٹے کالے دانے جنہیں گرم مصالحے میں شمار کیا جاتا ہے، اپنی بے شمار طبی اور غذائی خصوصیات کے باعث صدیوں سے انسانی صحت کے لیے استعمال ہو رہے ہیں۔ ان دانوں سے حاصل ہونے والا تیل بھی غیر معمولی فوائد کا حامل ہے، جس کے بارے میں جاننا اور اسے اپنی روزمرہ زندگی میں شامل کرنا جسمانی و ظاہری صحت کے لیے نہایت ضروری ہے۔
ثابت کلونجی کھانوں میں ذائقہ بڑھانے کے لیے استعمال کی جاتی ہے اور نہار منہ اس کا براہِ راست استعمال بھی کیا جاتا ہے، جو کئی بیماریوں کے علاج میں معاون ثابت ہوتا ہے۔ اس کے ساتھ ساتھ کلونجی کا تیل حسن و خوبصورتی کا قدرتی راز سمجها جاتا ہے۔ خشک اور بے رونق جلد یا کمزور اور روکھے بال رکھنے والے افراد کے لیے یہ تیل ایک مؤثر قدرتی علاج ہے۔
ماہرینِ امراضِ جِلد، بال اور ناخن کے مطابق کلونجی کا تیل بالوں کی جڑوں کو مضبوط کرنے اور جلد کو نرم و ملائم رکھنے کے لیے بہترین انتخاب ہے۔ اگر جلد پر کسی بھی قسم کا تیل یا سیرم استعمال نہ کیا جائے تو خشکی کے باعث چہرے پر قبل از وقت جھریاں پیدا ہو جاتی ہیں اور چہرہ اپنی تازگی کھو دیتا ہے۔ اسی طرح بالوں کی مناسب دیکھ بھال نہ ہونے پر وہ کمزور ہو کر گرنے لگتے ہیں اور وقت سے پہلے گنج پن کا خدشہ بڑھ جاتا ہے۔ ان تمام مسائل کا قدرتی علاج کلونجی کے تیل میں پوشیدہ ہے۔
کلونجی کے تیل میں پائے جانے والے اینٹی بیکٹیریل اجزاء جلد کے مساموں کو صاف کرتے ہیں، جس سے دانوں اور کیل مہاسوں میں واضح کمی آتی ہے۔ ماہرین کے مطابق یہ تیل جِلدی انفیکشن اور الرجی کو کم کرنے میں مدد دیتا ہے، جبکہ بالوں کی جڑوں سے سروں تک اس کا مساج کرنے سے خشکی ختم ہوتی ہے، بال گرنا بند ہو جاتے ہیں اور نیند کے مسائل میں بھی بہتری آتی ہے۔
ہفتے میں دو سے تین مرتبہ کلونجی کے تیل کا استعمال بالوں میں جان ڈالتا ہے، انہیں لمبا، بھرا ہوا اور مضبوط بناتا ہے، جبکہ چہرے کی رنگت صاف اور شفاف ہو جاتی ہے۔ باقاعدگی سے استعمال کرنے پر جلد اور بال دونوں کی مجموعی صحت بہتر ہوتی ہے۔
اس تیل میں موجود اینٹی آکسیڈنٹس نہ صرف جلد اور بالوں کی صفائی کرتے ہیں بلکہ روکھا پن ختم کر کے ان کی خوبصورتی اور جاذبیت میں اضافہ کرتے ہیں۔ یوں کلونجی کا تیل قدرت کا وہ انمول تحفہ ہے جو بیک وقت صحت، خوبصورتی اور اعتماد کو بحال کرنے میں اہم کردار ادا کرتا ہے۔
