امریکی صدر ڈونلڈ ٹرمپ نے دعویٰ کیا ہے کہ روس اور یوکرین کے درمیان جاری جنگ کے خاتمے کے لیے امن معاہدہ جلد طے پانے کے قریب ہے۔
وائٹ ہاؤس میں تھینک گیونگ کی تقریب سے خطاب کرتے ہوئے ٹرمپ نے کہا کہ اس جنگ میں ہزاروں فوجی ہلاک ہو چکے ہیں، مگر اب معاہدے کے مسودے پر غیر معمولی پیش رفت ہوئی ہے اور امن کے امکانات روشن ہو رہے ہیں۔
صدر ٹرمپ نے بتایا کہ انہوں نے گزشتہ نو ماہ میں دنیا کی آٹھ مختلف جنگوں کو ختم کرنے یا کم کرنے میں مدد کی، اور اب وہ روس-یوکرین جنگ کو ختم کرنے کے لیے بھی حتمی اقدامات کر رہے ہیں۔ انہوں نے اپنے خصوصی نمائندے اسٹیو وٹکوف کو ماسکو بھیجنے کی ہدایت کی ہے تاکہ روسی صدر سے ملاقات کر کے معاہدے کے آخری نکات پر بات چیت کی جا سکے۔
ٹرمپ کے مطابق، امن معاہدے میں اب صرف چند حساس اختلافی مسائل باقی ہیں جنہیں حل کرنے کی ضرورت ہے۔ وائٹ ہاؤس نے بھی اس بات کی تصدیق کی ہے کہ امن منصوبے میں اہم پیش رفت ہوئی ہے، لیکن کچھ حساس نکات پر مزید مذاکرات درکار ہیں۔
چند روز قبل امریکی اور یوکرینی حکام نے جنیوا میں 28 نکاتی امریکی امن تجویز پر بات چیت کی تھی، اور اس کے بعد دونوں ممالک نے ایک نئے فریم ورک پر کام شروع کرنے کا اعلان کیا تاکہ امن کی راہ ہموار ہو سکے۔
واضح رہے کہ ٹرمپ نے یوکرین کو امن معاہدہ قبول کرنے کے لیے 27 نومبر کی آخری تاریخ بھی دے رکھی ہے، جس کے بعد معاہدے پر حتمی فیصلہ متوقع ہے۔
