بنگلا دیش اور بھارت کے درمیان کشیدگی میں اضافہ دیکھنے میں آیا ہے، جس کے بعد بنگلا دیش نے نئی دہلی میں اپنے قونصلر اور ویزا خدمات کو عارضی طور پر معطل کرنے کا فیصلہ کیا ہے۔ یہ اقدام دونوں ممالک کے تعلقات میں بڑھتی ہوئی تناؤ اور حالیہ ناخوشگوار واقعات کے پیشِ نظر کیا گیا ہے۔
بنگلا دیشی میڈیا کے مطابق بنگلا دیشی مشن نے اعلان کیا ہے کہ موجودہ حالات کی وجہ سے قونصلر اور ویزا سروسز عارضی طور پر معطل کی گئی ہیں۔ بنگلا دیشی حکام کے مطابق یہ فیصلہ دو روز قبل ہائی کمیشن کے سامنے ہونے والے احتجاجی مظاہرے کے بعد کیا گیا، جس میں بھارتی مظاہرین نے ہائی کمشنر کو قتل کی دھمکیاں بھی دیں۔ بنگلا دیشی حکام نے واضح کیا کہ ایسے خطرناک اور جارحانہ رویے کے پیشِ نظر شہریوں کی حفاظت اور عملے کی سلامتی کو مدنظر رکھتے ہوئے یہ فوری اقدام ضروری تھا۔
بھارتی میڈیا کی رپورٹس کے مطابق بھارت نے بھی ایک روز قبل چٹاگانگ میں واقع ویزا سینٹر کی خدمات عارضی طور پر بند کر دی تھیں۔ یہ اقدامات دونوں ممالک کے درمیان بڑھتی ہوئی کشیدگی، تناؤ اور دو طرفہ تعلقات میں عدم اعتماد کی عکاسی کرتے ہیں۔ ماہرین کا کہنا ہے کہ اس قسم کے اقدامات معمولی نہیں ہیں اور یہ دونوں ممالک کے درمیان سفارتی تعلقات پر اثر ڈال سکتے ہیں، جبکہ قونصلر سروسز کی معطلی عام شہریوں، کاروباری افراد اور مسافروں کے لیے مشکلات کا سبب بن سکتی ہے۔
مزید یہ کہ بنگلا دیشی حکام نے عوام سے درخواست کی ہے کہ وہ موجودہ حالات کے دوران بھارت سے سفر کرنے یا ویزا خدمات حاصل کرنے میں احتیاط برتیں، تاکہ کسی بھی ناخوشگوار واقعے سے بچا جا سکے۔ اس کشیدگی کے پیشِ نظر سفارتی محاذ پر بات چیت اور دونوں ممالک کے وزرائے خارجہ کے درمیان رابطوں کی ضرورت پر زور دیا جا رہا ہے تاکہ حالات کو پرامن انداز میں حل کیا جا سکے۔
