ایران نے خبردار کیا ہے کہ اگر اس کے بجلی کے نظام کو نشانہ بنایا گیا تو وہ خطے میں اہم توانائی اور پانی کی تنصیبات پر جوابی کارروائی کر سکتا ہے۔
ایرانی فوج کے مرکزی کمانڈ کے ترجمان ابرہیم ذوالفقاری نے کہا کہ ایران صرف تیل و گیس کی فیکٹریاں ہی نہیں بلکہ صاف پانی کے پلانٹس اور انفارمیشن ٹیکنالوجی کے نظام کو بھی نشانہ بنا سکتا ہے، خاص طور پر وہ تنصیبات جو امریکا اور اسرائیل سے جڑی ہوں۔
یہ بیان ایسے وقت میں سامنے آیا جب امریکی صدر ڈونلڈ ٹرمپ نے ایران کو خبردار کیا تھا کہ اگر اس نے 48 گھنٹوں میں آبنائے ہرمز کو دوبارہ کھولنے کے لیے اقدامات نہ کیے تو ایران کے پاور پلانٹس کو نشانہ بنایا جا سکتا ہے۔
اسی دوران ایرانی خبر رساں ایجنسی فارس کے مطابق، سپریم نیشنل سیکیورٹی کونسل کے سابق سربراہ علی لاریجانی نے پہلے بھی کہا تھا کہ اگر ایران کے بجلی کے نظام پر حملہ کیا گیا تو پورا خطہ آدھے گھنٹے کے اندر اندھیرے میں ڈوب سکتا ہے۔
ماہرین کے مطابق اس طرح کے بیانات خطے میں کشیدگی میں اضافہ کر سکتے ہیں اور عالمی توانائی کے نظام پر بھی اثر ڈال سکتے ہیں۔
