امریکی صدر ڈونلڈ ٹرمپ نے عندیہ دیا ہے کہ ایران کے ساتھ مذاکرات کا دوسرا مرحلہ جلد شروع ہوسکتا ہے، جس کے لیے آئندہ چند دنوں میں پیش رفت متوقع ہے۔ ان کا کہنا تھا کہ اگلے دورِ مذاکرات میں مثبت نتائج سامنے آنے کی امید ہے اور دونوں ممالک کے درمیان بات چیت میں پیش رفت کے امکانات موجود ہیں۔
ایک امریکی اخبار کو دیے گئے انٹرویو میں ٹرمپ نے کہا کہ مذاکرات کا عمل آگے بڑھ رہا ہے اور صورتحال بہتر سمت میں جا سکتی ہے۔
دوسری جانب ایرانی وزارتِ خارجہ کے ترجمان اسماعیل بقائی نے اپنے بیان میں کہا کہ سفارتکاری قومی مفادات اور سلامتی کے تحفظ کا اہم ذریعہ ہے۔ انہوں نے واضح کیا کہ ایران حالات کا جائزہ لے کر ایسے اقدامات کرے گا جو اس کے مفادات کے لیے موزوں ہوں۔
یاد رہے کہ پاکستان کی درخواست پر امریکہ نے ایران کے خلاف ممکنہ کارروائی سے متعلق جنگ بندی کی مدت میں توسیع کی تھی۔ اس حوالے سے ڈونلڈ ٹرمپ نے کہا کہ پاکستانی قیادت نے ایران پر حملے سے گریز کی اپیل کی تھی۔
انہوں نے مزید بتایا کہ جنگ بندی میں اس وقت تک توسیع جاری رکھی جائے گی جب تک مذاکرات کا عمل مکمل نہیں ہو جاتا، تاکہ دونوں فریق کسی متفقہ حل تک پہنچ سکیں۔
