امریکی صدر ڈونلڈ ٹرمپ نے کہا ہے کہ لبنان پر کیا گیا حالیہ اسرائیلی فضائی حملہ مناسب وقت پر نہیں کیا گیا اور اسے اس مرحلے پر ہونے سے گریز کیا جانا چاہیے تھا، خاص طور پر ایسے وقت میں جب خطے میں ایران کے ساتھ ممکنہ معاہدے کے قریب پہنچا جا رہا ہے۔
اپنے بیان میں امریکی صدر نے کہا کہ اسرائیل کو اپنی سلامتی کے لیے دفاع کا حق حاصل ہے، تاہم ان کے مطابق لبنان پر کیا گیا یہ حملہ بے مقصد تھا کیونکہ اس میں کسی جانی نقصان کی اطلاع نہیں ملی۔
ڈونلڈ ٹرمپ نے زور دیتے ہوئے کہا کہ اس واقعے سے ایران کے ساتھ جاری سفارتی پیش رفت یا ممکنہ معاہدے کے عمل کو متاثر نہیں ہونا چاہیے۔ ان کے مطابق امریکہ لبنان سمیت پورے مشرق وسطیٰ میں دیرپا امن کے قیام کے لیے ایک اہم پیش رفت کے قریب ہے۔
انہوں نے تمام فریقین پر زور دیا کہ وہ کشیدگی میں کمی لائیں اور حالات کو مزید خراب کرنے سے گریز کریں۔ ان کا کہنا تھا کہ اسرائیل کو لبنان میں کسی بھی نوعیت کے مزید حملوں سے اجتناب کرنا چاہیے۔
اسی طرح انہوں نے کہا کہ حزب اللہ کی جانب سے بھی اسرائیل پر جوابی حملوں کا سلسلہ بند ہونا چاہیے تاکہ خطے میں کشیدگی کم ہو سکے۔ ان کے مطابق یہ صورت حال ایک طویل اور پائیدار امن کے آغاز کا موقع بن سکتی ہے، جسے ضائع نہیں ہونا چاہیے۔
