اسلام آباد/اٹک: اسلام آباد ہائی کورٹ (آئی ایچ سی) کے دو رکنی بینچ نے منگل کو توشہ خانہ کرپشن کیس میں پاکستان تحریک انصاف (پی ٹی آئی) کے چیئرمین عمران خان کی سزا معطل کرتے ہوئے انہیں ضمانت پر رہا کرنے کا حکم دے دیا۔
چیف جسٹس عامر فاروق اور جسٹس طارق محمود جہانگیری نے فریقین کے دلائل کے بعد گزشتہ سماعت پر محفوظ کیا گیا مختصر حکم نامہ سنایا۔ تاہم عدالت نے کہا کہ تحریری حکم نامہ بعد میں جاری کیا جائے گا جس میں سزا کی معطلی کی وجوہات بتائی جائیں گی۔
دریں اثنا، عمران خان کی قانونی ٹیم نے بھی آئی ایچ سی میں درخواست دائر کی جس میں سابق وزیراعظم کی کسی اور کیس میں گرفتاری روکنے کی درخواست کی گئی۔ درخواست میں نیب، ایف آئی اے اور پولیس کو مدعا علیہ نامزد کیا گیا ہے۔
Don’t forget to Subscribe our Youtube Channel & Press Bell Icon.
ٹرائل کورٹ نے 5 اگست کو توشہ خانہ فوجداری کیس میں پی ٹی آئی سربراہ کو تین سال قید کے ساتھ ایک لاکھ روپے جرمانے کی سزا سنائی تھی۔فیصلہ سنائے جانے کے فوراً بعد عمران خان کو گرفتار کر کے اٹک جیل منتقل کر دیا گیا تھا۔ عمران خان نے توشہ خانہ کیس میں تین سال کی سزا کو چیلنج کرتے ہوئے درخواست اپنے وکلا کے ذریعے دائر کی تھی جن میں بیرسٹر علی ظفر، سردار لطیف کھوسہ ایڈووکیٹ، بابر اعوان، سلمان اکرم راجہ ایڈووکیٹ، شعیب شاہین ایڈووکیٹ، بیرسٹر گوہر علی خان ایڈووکیٹ اور دیگر شامل تھے۔
