کسان کارڈ پر نواز شریف کی تصویر کو لاہور ہائیکورٹ میں چیلنج کر دیا گیا

لاہور: نئے متعارف کرائے گئے کسان کارڈ پر مسلم لیگ ن کے قائد نواز شریف کی تصویر لگانے کے اقدام کو لاہور ہائیکورٹ میں چیلنج کر دیا گیا۔

مشکور حسین نامی شہری نے وکیل کے ذریعے لاہور ہائیکورٹ سے رجوع کیا۔ درخواست میں وزیر اعلیٰ، صوبائی حکومت اور نواز شریف کو فریق بنایا گیا ہے۔

درخواست گزار نے استدعا کی کہ عوامی فنڈز ذاتی تشہیر کے لیے استعمال نہیں کیے جا سکتے اور کسان کارڈ پر نواز شریف کی تصویر چسپاں کرنا خلاف قانون ہے۔

درخواست گزار نے استدعا کی کہ حکومت پنجاب کو نواز شریف کی تصویر والا کسان کارڈ جاری کرنا بند کرنے کی ہدایت کی جائے۔

انہوں نے لاہور ہائیکورٹ سے درخواست کی کہ وہ حکام کو معاملے کے حتمی فیصلے تک کسان کارڈ کی پرنٹنگ بند کرنے کی ہدایت کرے۔

پنجاب کی وزیر اعلی مریم نواز نے جمعہ کو زرعی اصلاحات پر منعقدہ اجلاس کے دوران ‘نواز شریف کسان کارڈ’ کی منظوری دی تھی۔

وزیر اعلی نے کہا کہ کسان کارڈ کے ذریعے 500,000 کسانوں کو آسان شرائط پر ایک سال میں 150 ارب روپے کا قرض دیا جائے گا۔

Don’t forget to Subscribe our Youtube Channel & Press Bell Icon.