لاہور: پیرس اولمپکس میں عالمی ریکارڈ قائم کرنے والے قومی ہیرو ارشد ندیم وطن واپس پہنچ گئے، عوام کی بڑی تعداد اپنے قومی ہیرو کا استقبال کرنے کیلئے لاہور ایئرپورٹ پر موجود تھی، ارشد ندیم کے جہاز کو واٹر کینن سلیوٹ پیش کیا گیا۔
وزیر کھیل پنجاب فیصل ایوب کھوکھر ، سپورٹس بورڈ کے اعلیٰ حکام ان کے استقبال کے لیے ایئرپورٹ پر پہنچے، ارشد ندیم کے استقبال کیلئے ان کے اہل خانہ بھی گاؤں سے لاہور پہنچے، اہلخانہ میں والد، والدہ، بہنیں، بھائی اور بچے شامل تھے، گاؤں سے کافی تعداد میں لوگ بھی ان کے ہمراہ آئے۔
ارشد ندیم کے لاہور ایئرپورٹ پر استقبال کیلئے اے ایس ایف کو 50 سے زائد مہمانوں کی فہرست موصول ہوئی تھی جس کے باعث سکیورٹی کے سخت انتظامات کئے گئے تھے، پولیس کے ساتھ رینجرز نے بھی سکیورٹی کے فرائض سرانجام دیئے۔
گولڈ میڈلسٹ ارشد ندیم پیرس سے براستہ استنبول لاہور پہنچے، قومی ہیرو کے جہاز نے رات ڈیڑھ بجے لاہور ایئرپورٹ پر لینڈ کیا، عوام قومی ہیرو کی ایک جھلک دیکھنے کیلئے بے تاب تھی، ارشد ندیم کا فقید المثال استقبال کیا گیا۔
Don’t forget to Subscribe our Youtube Channel & Press Bell Icon.
جیسے ہی ارشد ندیم کا طیارہ رن وے پر لینڈ کیاتو ’’ارشد ندیم زندہ باد، پاکستان زندہ باد‘‘ کے نعروں س فضا گونج اٹھی۔ اُن کے چاہنے والوں نے اپنے ہیرو پر پھولوں کی پتیاں نچھاور کیں اور ڈھول کی تھاپ پر بھنگڑے ڈالے۔
ارشد ندیم نے وطن واپسی پر میڈیا سے گفتگو کرتے ہوئے کہا کہ کئی سال بعد پاکستان کو خوشی ملی، میری جیت پر نیرج بھی خوش ہے، 90 میٹر سے اوپر تھرو پھینکی تو یقین ہو گیا پاکستان گولڈ میڈل جیت گیا، آئندہ بھی ملک کا نام روشن کرنے میں کوئی کسر نہیں چھوڑوں گا۔
واضح رہے کہ ارشد ندیم نے اولمپک ریکارڈ کے ساتھ جیولین تھرو مقابلے میں گولڈ میڈل جیتا ہے، انہوں نے 92.97 میٹر تھرو کرکے نیا اولمپک ریکارڈ قائم کیا۔
مینز جیولین تھرو ایونٹ کے فائنل میں ارشد ندیم نے پاکستان کو 40 سال بعد گولڈ میڈل جتوایا، ارشد ندیم پاکستان کی جانب سے اولمپکس کے انفرادی مقابلوں میں گولڈ میڈل جیتنے والے پہلے کھلاڑی ہیں۔
