امریکا نے وائٹ ہاؤس کے قریب پیش آنے والے فائرنگ کے واقعے کے بعد افغان شہریوں کی امیگریشن درخواستیں غیر معینہ مدت کے لیے فوری طور پر معطل کر دی ہیں۔
واشنگٹن میں وائٹ ہاؤس کے قریب نیشنل گارڈز پر ہونے والے حملے میں دو اہلکار شدید زخمی ہو گئے، جس کے بعد ٹرمپ انتظامیہ نے ہنگامی بنیادوں پر یہ فیصلہ کیا۔ واقعے کے بعد امریکی حکام نے سکیورٹی سخت کر دی ہے اور علاقے میں اضافی حفاظتی اقدامات کیے گئے ہیں۔
امریکی میڈیا کی رپورٹ کے مطابق گرفتار شدہ مشتبہ شخص کی شناخت 29 سالہ افغان شہری رحمان اللہ لکن وال کے طور پر کی گئی ہے، جس پر الزام ہے کہ اس نے نیشنل گارڈ کے دو اہلکاروں پر فائرنگ کی۔ زخمی اہلکاروں کی حالت تشویشناک بتائی جا رہی ہے اور انہیں فوری طبی امداد فراہم کی جا رہی ہے۔
امریکی سیٹیزن شپ اینڈ امیگریشن سروس نے سوشل میڈیا پلیٹ فارم ایکس پر جاری بیان میں کہا ہے کہ افغان شہریوں کی امیگریشن درخواستوں کا مکمل سکیورٹی جائزہ لیا جائے گا، جس کے باعث تمام درخواستیں وقتی طور پر روک دی گئی ہیں۔
بیان میں مزید کہا گیا کہ حفاظتی پروٹوکول اور جانچ کے نظام کا دوبارہ تفصیلی جائزہ لینے کے بعد ہی امیگریشن درخواستوں کی بحالی کے بارے میں فیصلہ کیا جائے گا، تاکہ ایسے کسی بھی واقعے سے نمٹنے کے لیے مضبوط حفاظتی اقدامات یقینی بنائے جا سکیں۔
