غزہ میں اسرائیلی فوج کی جانب سے جنگ بندی کی خلاف ورزیوں کا سلسلہ مسلسل جاری ہے۔ گزشتہ روز صہیونی افواج نے ایک گھر کو نشانہ بنایا، جس کے نتیجے میں ابو شاوِش خاندان کے تمام افراد شہید ہو گئے۔ القدس نیوز نیٹ ورک کے مطابق شہید ہونے والوں میں رامی، سحر، محمد، بتول، تیما، یوسف اور حبیبہ ابو شاوِش شامل ہیں۔
غزہ کے سرکاری میڈیا آفس کے مطابق، امریکا کی ثالثی میں طے شدہ جنگ بندی کے بعد 44 دنوں میں اسرائیل نے کم از کم 497 مرتبہ معاہدے کی خلاف ورزی کی ہے۔ ان کارروائیوں میں مجموعی طور پر 342 فلسطینی شہری شہید ہو چکے ہیں، جن میں زیادہ تر بچے، خواتین اور معمر افراد شامل ہیں۔ گزشتہ روز ہفتے کے روز 27 خلاف ورزیوں میں 24 فلسطینی شہید اور 87 زخمی ہوئے۔
حالیہ واقعات میں اسرائیلی افواج نے غزہ میں ایک اور فضائی حملوں کی لہر چلائی، جس میں کم از کم 24 افراد، جن میں بچے بھی شامل ہیں، جان بحق ہوئے۔ یہ کارروائیاں چھ ہفتوں سے جاری جنگ بندی کی ایک اور کھلی خلاف ورزی کے طور پر دیکھی جا رہی ہیں۔
حکام کا کہنا ہے کہ اسرائیل جنگ بندی کے تحت ضروری قرار دی گئی امدادی سامان اور طبی سپلائی کی آزادانہ ترسیل میں مسلسل رکاوٹیں ڈال رہا ہے، جس کے باعث غزہ میں انسانی بحران مزید سنگین ہوتا جا رہا ہے۔
