ادارتی تجزیہ
پاکستان کی معیشت کا بنیادی ستون سمجھی جانے والی کپاس ایک بار پھر شدید بحران سے دوچار ہے۔ حالیہ بارشوں اور سیلابوں نے پنجاب اور سندھ کے کپاس زون کو بری طرح متاثر کیا ہے، جبکہ وائرس کے حملوں نے صورتحال کو مزید بگاڑ دیا ہے۔ مئی میں جب کپاس کی جننگ کا آغاز غیر معمولی طور پر جلد ہوا تو یہ توقع کی جا رہی تھی کہ پیداوار میں 20 سے 25 فیصد اضافہ ہوگا۔ تاہم اب خاص طور پر بہاولنگر میں تقریباً 40 فیصد فصل تباہ ہو چکی ہے اور باقی پر بھی خطرات منڈلا رہے ہیں۔
یہ بحران پاکستان کی پالیسی کمزوریوں اور ماحولیاتی خطرات کو آشکار کرتا ہے۔ تازہ پانی والے علاقوں میں گنے کی بے تحاشا کاشت نے کپاس کو بیماریوں اور وائرس کے حملوں کے لیے کمزور بنا دیا ہے۔ نکاسی آب کے ناقص نظام نے پانی کھڑا کر کے فصلوں کو مزید نقصان پہنچایا۔ فیکٹریاں بند ہو رہی ہیں، کاشتکار اور جنرز مالی دباؤ میں ہیں، اور کپاس کی قیمتیں گرتی جا رہی ہیں۔
ضرورت اس امر کی ہے کہ حکومت وقتی اقدامات سے آگے بڑھے اور ایک مربوط قومی حکمتِ عملی مرتب کرے جس میں موسمیاتی اثرات سے تحفظ، فصل بندی کا مؤثر نظام، اور جدید بیجوں کی فراہمی شامل ہو۔ وفاقی وزیر تجارت جام کمال کی نئی ٹیکسٹائل پالیسی کی یقین دہانی خوش آئند ہے لیکن جب تک کپاس کی پیداوار مستحکم نہیں ہوگی، برآمدی ترقی ایک خواب ہی رہے گی۔
