اسلام آباد: اقتصادی رابطہ کمیٹی (ای سی سی) نے اسٹیٹ بینک آف پاکستان کو ہدایت دی ہے کہ وہ فوری طور پر چھوٹے کسانوں اور پسماندہ علاقوں کیلئے نئی رسک کوریج اسکیم کا نوٹیفکیشن جاری کرے۔ حکام کے مطابق اس اسکیم کا مقصد زرعی قرضوں میں عدم توازن کو ختم کرنا ہے جہاں بڑے زمیندار زیادہ تر سہولیات حاصل کرتے ہیں جبکہ چھوٹے کسان محروم رہ جاتے ہیں۔
وزارتِ خزانہ کی بریفنگ کے مطابق اس وقت پنجاب اور سندھ میں 97 فیصد زرعی قرضے تقسیم ہوتے ہیں جبکہ خیبر پختونخوا، بلوچستان، آزاد جموں و کشمیر اور گلگت بلتستان کو صرف 3 فیصد حصہ ملتا ہے۔ مزید یہ کہ بڑے کسان جو کل قرض لینے والوں کا صرف 7 فیصد ہیں، 68 فیصد قرضے حاصل کرتے ہیں جبکہ چھوٹے کسان جو 93 فیصد ہیں، محض 32 فیصد پر گزارا کرتے ہیں۔
منظور شدہ اسکیم کے تحت پنجاب اور سندھ کے چھوٹے کسانوں کو سہولت دی جائے گی جبکہ خیبر پختونخوا، بلوچستان، آزاد جموں و کشمیر اور گلگت بلتستان کے تمام کسانوں کو شامل کیا گیا ہے۔ توقع ہے کہ اس اقدام سے آئندہ تین برسوں میں سات لاکھ پچاس ہزار سے زائد نئے کسان باضابطہ قرضہ جاتی نظام میں شامل ہو سکیں گے۔
