پاکستان اور افغانستان کے درمیان فوری جنگ بندی طے پا گئی ہے، جس کی باضابطہ تصدیق قطری وزارتِ خارجہ نے کر دی ہے۔ وزارت کے مطابق یہ فیصلہ دوحہ میں ہونے والے مذاکرات کے دوران کیا گیا، جو قطر اور ترکیے کی مشترکہ ثالثی سے منعقد ہوئے۔
دونوں ممالک نے اتفاق کیا ہے کہ آنے والے دنوں میں مزید ملاقاتیں کی جائیں گی تاکہ ایک مستقل امن و استحکام کا ڈھانچہ تشکیل دیا جا سکے۔ قطری وزارتِ خارجہ کے بیان کے مطابق یہ جنگ بندی خطے میں پائیدار امن کے قیام کے لیے ایک مضبوط بنیاد ثابت ہو گی اور اس سے دونوں ممالک کے درمیان سرحدی کشیدگی کے خاتمے کی امید ہے۔
واضح رہے کہ مذاکرات کا پہلا دور دوحہ میں قطری انٹیلی جنس چیف عبداللہ بن محمد الخلیفہ کی میزبانی میں ہوا، جس میں پاکستانی وفد کی قیادت وزیر دفاع خواجہ آصف نے کی، جبکہ ان کے ہمراہ اعلیٰ دفاعی حکام بھی شریک تھے۔
افغان وفد کی سربراہی وزیر دفاع ملا محمد یعقوب نے کی، جن کے ساتھ افغان انٹیلی جنس کے سربراہ عبدالحق وثیق بھی شامل تھے۔
