عمران حفیظ
ڈاکٹر یاسمین راشد کا نام پاکستانی سیاست میں محض ایک جماعت سے وابستگی کا نہیں، بلکہ خواتین کی سیاسی شرکت، استقامت، اور ریاستی جبر کے خلاف مزاحمت کی علامت بن چکا ہے۔ انہوں نے صرف ایک طویل سیاسی سفر طے کیا بلکہ خود کو ایسی مثال کے طور پر پیش کیا جس نے خواتین کے لیے سیاست کے میدان کو قابلِ رسائی اور قابلِ عزت بنانے میں کلیدی کردار ادا کیا۔
پاکستان کے 2024 کے انتخابات میں لاہور کے ایک اہم حلقے میں سابق وزیراعظم نواز شریف کے خلاف ان کی انتخابی مہم ایک علامتی اور حقیقی جدوجہد تھی۔ متعدد غیر جانبدار ماہرین کے مطابق، فارم 45 کے شواہد اس بات کی تصدیق کرتے ہیں کہ وہ واضح برتری سے جیت چکی تھیں۔ تاہم، سرکاری نتائج میں ان کی شکست کا اعلان انتخابی شفافیت پر ایک بڑا سوالیہ نشان ہے۔
ڈاکٹر یاسمین راشد کی شخصیت کا اصل جوہر صرف انتخابی سیاست نہیں، بلکہ وہ جمہوریت کے تحفظ کی خاطر دی جانے والی مسلسل مزاحمت میں بھی نظر آتا ہے۔ گرفتاریوں، ریاستی دباؤ، اور بیماری کے باوجود ان کا ڈٹ کر کھڑا ہونا سیاسی استقامت کی ایک نادر مثال ہے۔ بطور سینئر شہری، ماہر معالج، اور خاتون، ان کی جدوجہد نے پاکستان کی سیاسی تاریخ میں ایک منفرد باب رقم کیا۔
ان پر عائد کی گئی دس سال قید کی سزا محض ایک فرد کو نشانہ بنانا نہیں بلکہ خواتین کی اجتماعی حوصلہ شکنی کی کوشش ہے۔ یہ سزا دراصل ان تمام خواتین کے لیے ایک انتباہ ہے جو سیاست میں قدم رکھنا چاہتی ہیں۔ یہ ایک سماجی رویے کی عکاسی بھی ہے جو خواتین کو قیادت سے روکنا چاہتا ہے۔
پاکستان جیسے روایتی معاشرے میں خواتین سیاسی کارکنان کو شکوک و شبہات سے دیکھا جاتا ہے۔ ڈاکٹر یاسمین راشد نے اپنے عمل سے ان دقیانوسی خیالات کو مسترد کیا۔ ان کی قیادت، عوامی جلسوں میں شرکت، اور انتخابی عمل میں بھرپور موجودگی یہ ثابت کرتی ہے کہ اگر خواتین کو مواقع دیے جائیں تو وہ مردوں کے شانہ بشانہ، بلکہ بعض پہلوؤں میں بہتر قیادت فراہم کر سکتی ہیں۔
جمہوریت کی اصل روح اختلافِ رائے اور ہر طبقے کی شمولیت میں ہے۔ خواتین کی سیاسی شرکت صرف صنفی نمائندگی نہیں بلکہ جمہوری توازن اور معاشرتی ہم آہنگی کے لیے ضروری ہے۔ اگر ہم جمہوریت کو مضبوط بنانا چاہتے ہیں تو ڈاکٹر یاسمین راشد جیسے کرداروں کو سراہنا ہوگا، نہ کہ سزا دینا۔
