نگراں وزیراعظم انوار الحق کاکڑ نے کہا ہے کہ گوادر کی ترقی کے لیے مزید مواقع پیدا کیے جائیں گے۔
گوادر میں میڈیا سے گفتگو کرتے ہوئے انہوں نے کہا کہ بلوچستان حکومت ترقیاتی منصوبوں کی تکمیل میں مکمل تعاون کر رہی ہے جس سے ساحلی شہر کے عوام مستفید ہوں گے۔
قبل ازیں نگراں وزیراعظم انوار الحق کاکڑ نے گوادر میں پاک چائنہ فرینڈ شپ ہسپتال اور سمندری پانی کو صاف کرنے کے پلانٹ کا افتتاح کیا۔
اس موقع پر تقریب سے خطاب کرتے ہوئے وزیراعظم نے اس اعتماد کا اظہار کیا کہ پلانٹ سے گوادر شہر میں پانی کا مسئلہ کافی حد تک حل ہو جائے گا۔
انہوں نے پاک چائنہ فرینڈ شپ ہسپتال کی تعمیر کے لیے چینی تعاون کو بھی سراہا۔
وزیراعظم نے کہا کہ گوادر انٹرنیشنل ایئرپورٹ بھی آپریشنل ہونے کے مرحلے میں ہے۔
انہوں نے ہدایت کی کہ گوادر میں بجلی کے مسئلے سے نمٹنے کے لیے شمالی زون کو نیشنل گرڈ سے منسلک کیا جائے۔
Don’t forget to Subscribe our Youtube Channel & Press Bell Icon.
انوار الحق کاکڑ نے کہا کہ چین پاکستان اقتصادی راہداری کے تحت رابطوں میں بہتری سے بے پناہ فوائد حاصل ہوئے ہیں۔
انہوں نے زور دے کر کہا کہ گوادر اور بلوچستان کی ترقی کی سمت متعین ہو چکی ہے اور اب آگے بڑھیں گے۔انہوں نے کہا کہ کوئی بھی اسے طاقت یا تشدد کے ذریعے نہیں پلٹا سکتا۔
وزیراعظم نے پاکستان میں چینی شہریوں کے تحفظ کو یقینی بنانے کی یقین دہانی کرائی۔ انہوں نے اس بات کا اعادہ کیا کہ وفاقی اور صوبائی حکومتیں، مسلح افواج اور قانون نافذ کرنے والے ادارے کسی کو چینی شہریوں کو نقصان پہنچانے کی اجازت نہیں دیں گے۔
انوار الحق کاکڑنے کہا کہ مجھے یقین تھا کہ پاکستان چین دیرینہ دوستی کے نتیجے میں گوادر صنعتوں اور تجارتی رابطوں کا مرکز بن کر ابھرے گا۔
اس موقع پر اپنے خطاب میں پاکستان میں چین کے سفیر جیانگ زیڈونگ نے کہا کہ ہمارا مقصد سی پیک سے متعلقہ منصوبوں کی بروقت تکمیل کو یقینی بنانا ہے۔انہوں نے کہا کہ دونوں ممالک باہمی تعاون کے ذریعے اپنے تعلقات کو نئی بلندیوں تک لے جائیں گے۔
تقریب سے خطاب کرتے ہوئے نگراں وزیراعلیٰ بلوچستان میر علی مردان خان ڈومکی نے کہا کہ پاکستان کی ترقی بلوچستان کی ترقی سے جڑی ہوئی ہے۔انہوں نے کہا کہ حکومت گوادر شہر کی ترقی اور لوگوں کے معیار زندگی کو بہتر بنانے کے لیے پرعزم ہے۔
انہوں نے کہا کہ پاک چائنا فرینڈ شپ ہسپتال گوادر کے لوگوں کو صحت کی بہتر سہولیات فراہم کرے گا۔
