نیشنل انسٹی ٹیوٹ آف ہیلتھ کی پولیو خاتمے کی ریجنل ریفرنس لیبارٹری نے پیر کو تصدیق کی کہ گلگت بلتستان کے ضلع دیامر سے وائلڈ پولیو وائرس کا پہلا کیس سامنے آیا ہے۔
یہ پاکستان میں اس سال رپورٹ ہونے والا گیارہواں پولیو کا کیس ہے۔
ملک بھر میں تیسری پولیو ویکسین مہم 26 مئی سے شروع ہو کر اتوار کو مکمل ہوئی۔
پاکستان کے پولیو خاتمہ پروگرام کی جانب سے جاری کردہ نوٹیفکیشن کے مطابق، اس مہم کے دوران ملک کے 159 اضلاع میں پانچ سال سے کم عمر 45 ملین سے زائد بچوں کو ویکسین دی گئی، جن میں ملک کے ہائی رسک علاقے بھی شامل ہیں۔
صدر آصف علی زرداری نے قبل ازیں عوام، میڈیا، اساتذہ، مذہبی رہنماؤں اور کمیونٹی کے افراد سے اپیل کی کہ وہ پولیو ویکسین مہم میں تعاون کریں، آگاہی پھیلائیں اور پولیو سے متعلق غلط فہمیوں کو ختم کریں تاکہ پاکستان کو پولیو سے پاک بنایا جا سکے۔
صدر نے کہا، “میں والدین سے درخواست کرتا ہوں کہ وہ ہر بچے کو پولیو ویکسین دلائیں۔ اساتذہ، علما، اور کمیونٹی کے بزرگوں سے اپیل ہے کہ وہ اس مہم کی حمایت کریں اور غلط فہمیوں کو دور کریں۔ میڈیا سے بھی گزارش ہے کہ وہ پولیو ویکسین کی حفاظت اور افادیت کے حقائق کو عام کرے۔”
یہ پیغام ملک گیر پولیو خاتمہ مہم کے موقع پر دیا گیا، جس کا ہدف 45.4 ملین پانچ سال سے کم عمر بچوں کو ویکسین فراہم کرنا ہے۔
