بھارت اور یورپی یونین نے طویل انتظار کے بعد ایک تاریخی تجارتی معاہدے کو حتمی شکل دے دی ہے۔
بھارتی وزیر اعظم نریندر مودی نے اس معاہدے کو ’’مدر آف آل ڈیلز‘‘ قرار دیتے ہوئے کہا ہے کہ یہ بھارت اور یورپ کے کروڑوں عوام کے لیے معاشی مواقع پیدا کرے گا اور تجارتی تعلقات کو مضبوط کرے گا۔
مودی کے مطابق تقریباً دو دہائیوں کی وقفے وقفے سے جاری بات چیت کے بعد یہ معاہدہ طے پایا ہے، جس کے تحت بھارت اپنی بڑی لیکن محفوظ مارکیٹ کو یورپی یونین کے 27 ممالک کے لیے فری ٹریڈ کے تحت کھولے گا۔ اس وقت یورپی یونین بھارت کا سب سے بڑا تجارتی شراکت دار ہے۔
بھارتی وزیر اعظم اور یورپی کمیشن کی صدر اُرسلا فان ڈیر لیئن نئی دہلی میں بھارت-یورپی یونین سمٹ کے دوران معاہدے کی تفصیلات کا مشترکہ اعلان کریں گے۔ مالی سال 2025 میں بھارت اور یورپی یونین کے درمیان تجارتی حجم 136.5 ارب ڈالر ریکارڈ کیا گیا تھا۔
بھارتی حکام کے مطابق معاہدے پر باضابطہ دستخط قانونی جانچ کے بعد کیے جائیں گے، جس میں تقریباً پانچ سے چھ ماہ لگ سکتے ہیں، اور معاہدے پر عمل درآمد ایک سال کے اندر متوقع ہے۔
یہ معاہدہ ایسے وقت سامنے آیا ہے جب یورپی یونین اور بھارت دونوں، امریکا کے ساتھ غیر یقینی تجارتی حالات کے پیش نظر، متبادل شراکت داریوں کو فروغ دے رہے ہیں۔
ماہرین کے مطابق اس معاہدے سے بھارت کو محنت طلب شعبوں میں برآمدات بڑھانے میں مدد ملے گی، جبکہ یورپی مصنوعات بھارتی مارکیٹ میں جلد ہی قیمت اور رسائی کے فائدے حاصل کریں گی۔
