ایرانی وزیر خارجہ عباس عراقچی نے امریکی صدر ڈونلڈ ٹرمپ کے بیان کو غیر ذمہ دارانہ اور خطرناک قرار دیتے ہوئے کہا ہے کہ عوامی املاک پر کسی بھی مجرمانہ حملے کو برداشت نہیں کیا جائے گا۔
عراقچی نے کہا کہ ماضی کی طرح ایرانی عوام کسی بھی بیرونی مداخلت کو مسترد کریں گے اور ملکی داخلی امور میں کسی کو دخل اندازی کی اجازت نہیں دی جائے گی۔
انہوں نے مزید کہا کہ ایران کی مسلح افواج الرٹ ہیں اور ملکی خودمختاری کی کسی بھی خلاف ورزی کی صورت میں وہ صحیح نشانہ معلوم رکھتے ہیں۔
عراقچی نے تسلیم کیا کہ ایران میں زرِمبادلہ کی شرح میں اتار چڑھاؤ کے سبب شہری احتجاج کر رہے ہیں، جو ان کا جائز حق ہے۔ تاہم انہوں نے یہ بھی کہا کہ کچھ واقعات میں تشدد ہوا ہے، جن میں پولیس اسٹیشن اور اہلکاروں پر حملے بھی شامل ہیں۔
واضح رہے کہ امریکی صدر ڈونلڈ ٹرمپ نے گزشتہ روز ایران کی صورتحال کے حوالے سے کہا تھا کہ اگر مظاہرین پر مزید تشدد کیا گیا تو امریکا مداخلت کے لیے تیار ہے۔ صدر نے سوشل میڈیا پر اپنے بیان میں کہا کہ امریکا پُرامن مظاہرین کے تحفظ کے لیے ایران میں کارروائی کر سکتا ہے۔
