ایرانی صدر مسعود پزشکیان نے کہا ہے کہ ایران کے رہبر اعلیٰ آیت اللّٰہ علی خامنہ ای پر کسی بھی قسم کا حملہ ایران کے لیے مکمل جنگ کے مترادف ہوگا۔
اپنے بیان میں ایرانی صدر نے مزید کہا کہ ایرانی عوام کی مشکلات اور مسائل کی اصل وجہ امریکا اور اس کے اتحادیوں کی عائد کردہ غیر انسانی پابندیاں ہیں۔ انہوں نے واضح کیا کہ سپریم لیڈر کے خلاف کسی بھی جارحانہ کارروائی کو ایرانی قوم کے خلاف براہِ راست حملہ سمجھا جائے گا۔
خیال رہے کہ گزشتہ روز امریکی صدر ڈونلڈ ٹرمپ نے کہا تھا کہ ایران میں نئی قیادت کی ضرورت آ گئی ہے۔ ٹرمپ کا یہ بیان ایسے وقت میں سامنے آیا جب ملک گیر احتجاج کمزور پڑتے دکھائی دے رہے ہیں، جبکہ ایرانی حکومت دعویٰ کر رہی ہے کہ حالات مکمل طور پر قابو میں ہیں۔
اس سے قبل ایرانی سپریم لیڈر نے ملک میں ہلاکتوں اور بدامنی کے ذمہ دار ٹرمپ کو ٹھہرایا تھا۔ اس کے جواب میں ٹرمپ نے کہا کہ تہران کے حکمران جبر اور تشدد پر انحصار کرتے ہیں، جو کہ قیادت کی مثال کے طور پر غیر معمولی ہے۔
ٹرمپ نے مزید کہا کہ ایران پر حملہ نہ کرنے کے لیے کسی نے انہیں قائل نہیں کیا بلکہ انہوں نے خود فیصلہ کیا۔ ان کے مطابق قیادت کا مطلب احترام اور ترقی ہے، خوف اور موت نہیں، اور اقتدار برقرار رکھنے کے لیے ہزاروں لوگوں کو مارنے کے بجائے حکمرانوں کو ملک کو بہتر طریقے سے چلانے پر توجہ دینی چاہیے، جیسا کہ وہ امریکا میں کرتے ہیں۔
امریکی صدر نے کہا کہ ناقص قیادت کی وجہ سے ایران دنیا میں رہنے کے لیے بدترین جگہ بن چکا ہے۔
