اسرائیلی فوج کے سربراہ ایال زمیر نے ایک بار پھر سخت مؤقف اختیار کرتے ہوئے کہا ہے کہ اسرائیل کسی بھی وقت اپنے دشمنوں کے خلاف کارروائی کرنے کی صلاحیت رکھتا ہے اور ضرورت پڑنے پر حملے سے گریز نہیں کیا جائے گا۔
انہوں نے حالیہ بیان میں کہا کہ 7 اکتوبر 2023 کو حماس کے ساتھ شروع ہونے والی جنگ بعد ازاں وسیع ہو گئی، جس میں یمن، ایران اور دیگر فریق بھی شامل ہوتے چلے گئے۔ ایال زمیر نے واضح کیا کہ اسرائیل جہاں اور جب ضروری سمجھے گا، دشمن کے خلاف کارروائی کرے گا۔
اسرائیلی آرمی چیف نے ایران پر الزام عائد کیا کہ وہ اسرائیل مخالف سرگرم عناصر کو مالی اور عسکری مدد فراہم کر رہا ہے اور اسرائیل کو نقصان پہنچانے کے منصوبوں کے پیچھے بھی ایران کا ہاتھ ہے۔ ان کے مطابق اسرائیل اپنے دفاع اور قومی سلامتی کے لیے کسی بھی حد تک جا سکتا ہے۔
یہ بیان ایسے وقت میں سامنے آیا ہے جب امریکی میڈیا کی رپورٹس میں دعویٰ کیا گیا ہے کہ اسرائیلی وزیراعظم بنیامین نیتن یاہو واشنگٹن میں امریکی صدر ڈونلڈ ٹرمپ سے ممکنہ ملاقات کے دوران ایران پر ممکنہ نئے حملوں پر تبادلہ خیال کر سکتے ہیں۔ رپورٹس کے مطابق اسرائیل کو تشویش ہے کہ ایران اپنے بیلسٹک میزائل پروگرام کی دوبارہ تعمیر اور توسیع میں مصروف ہے۔
