لاہور: تاریخ میں پہلی بار خاتون جج جسٹس عالیہ نیلم کو لاہور ہائی کورٹ کی چیف جسٹس مقرر کر دیا گیا۔
سپریم جوڈیشل کونسل نے چیف جسٹس آف پاکستان قاضی فائز عیسا کی زیر صدارت اجلاس میں متفقہ طور پر ان کے نام کی منظوری دی۔ کونسل نے اس عہدے کے لیے جسٹس شجاعت علی خان اور جسٹس باقر نجفی کے ناموں پر بھی غور کیا۔
وہ جسٹس ملک شہزاد احمد خان کی جگہ لیں گی جنہیں سپریم کورٹ آف پاکستان میں ترقی دی گئی ہے۔
جسٹس عالیہ نیلم کون ہیں؟
جسٹس نیلم، جو ہائی کورٹ کی سنیارٹی لسٹ میں تیسرے نمبر پر تھیں، 1966 میں پیدا ہوئیں۔ انہوں نے 1995 میں پنجاب یونیورسٹی لاء کالج سے قانون کی ڈگری حاصل کی اور کئی دیگر قانونی ڈپلومے بھی حاصل کیے۔
انہوں نے اپنے قانونی کیریئر کا آغاز 1996 میں ایک رجسٹرڈ وکیل کے طور پر کیا اور 1998 میں ہائی کورٹ اور 2008 میں سپریم کورٹ کی وکالت کا لائسنس حاصل کیا۔
جسٹس عالیہ نیلم2013میں لاہور ہائی کورٹ کی ایڈہاک جج مقرر ہوئیں اور 2015 میں مستقل جج بن گئیں۔ انہوں نے ویڈیو لنک کے ذریعے شواہد ریکارڈ کرنے کے لیے معیاری آپریٹنگ طریقہ کار (ایس او پیز) بھی قائم کیا۔
Don’t forget to Subscribe our Youtube Channel & Press Bell Icon.
