روس نے وینزویلا کے لیے مکمل حمایت کا اعلان کرتے ہوئے امریکی کارروائیوں پر گہری تشویش کا اظہار کیا ہے، جو وینزویلا کے تیل بردار جہازوں کو نشانہ بنا رہی ہیں۔
روسی اور وینزویلا کے وزرائے خارجہ کے درمیان ٹیلی فونک رابطے میں امریکی اقدامات کو بین الاقوامی قوانین کی خلاف ورزی قرار دیا گیا۔ روسی وزارت خارجہ کے مطابق وزیر خارجہ سرگئی لاوروف اور وینزویلا کے وزیر خارجہ ایوان گل نے کیریبین سمندر میں جہازوں پر بمباری اور ٹینکروں کی ضبطی پر شدید تحفظات ظاہر کیے اور وینزویلا کی قیادت و عوام کے ساتھ مکمل یکجہتی کا اعادہ کیا۔
دونوں ممالک نے عالمی فورمز بشمول اقوام متحدہ پر قریبی تعاون جاری رکھنے پر اتفاق کیا تاکہ ریاستی خودمختاری اور اندرونی معاملات میں مداخلت کو روکا جا سکے۔ وینزویلا کے وزیر خارجہ نے کہا کہ امریکی کارروائیاں غیر قانونی قبضے، سمندری قزاقی اور جارحیت کے مترادف ہیں اور عالمی قوانین کی سنگین خلاف ورزی ہیں۔
امریکی صدر ڈونلڈ ٹرمپ نے 16 دسمبر کو وینزویلا کے پابندی شدہ تیل بردار جہازوں کے خلاف ناکہ بندی کا اعلان کیا تھا، جس میں الزام ہے کہ وینزویلا تیل سے حاصل شدہ آمدنی غیر قانونی سرگرمیوں کے لیے استعمال کر رہا ہے۔ چین نے بھی اس اقدام کی مخالفت کرتے ہوئے کہا کہ کسی ملک کے جہازوں پر زبردستی قبضہ بین الاقوامی قانون کی خلاف ورزی ہے اور وہ یکطرفہ پابندیوں کے خلاف ہے۔
عالمی سطح پر روس اور وینزویلا کے حوالے سے بڑھتی کشیدگی کے باعث تیل کی قیمتوں میں اضافہ دیکھا گیا ہے۔ برینٹ خام تیل اور امریکی ویسٹ ٹیکساس انٹرمیڈیٹ کی قیمتوں میں دو فیصد سے زائد اضافہ ریکارڈ کیا گیا، جبکہ ماہرین کو تیل کی سپلائی متاثر ہونے کا خدشہ ہے۔
