امریکا اور بھارت نے دفاعی تعاون کو مزید مضبوط بنانے کے لیے 10 سالہ فریم ورک معاہدے پر دستخط کیے ہیں۔ امریکی وزیرِ دفاع پیٹ ہیگ کے مطابق، یہ معاہدہ دونوں ممالک کے درمیان دفاعی تعلقات، جدید ٹیکنالوجی کے تبادلے اور انٹیلی جنس تعاون کو فروغ دے گا۔
امریکی وزیرِ دفاع پیٹ ہیگ نے کہا کہ یہ فریم ورک جنوبی ایشیا میں علاقائی استحکام اور مشترکہ سلامتی کے لیے ایک اہم سنگِ میل ثابت ہوگا۔ انہوں نے سوشل میڈیا پلیٹ فارم ایکس پر لکھا کہ “امریکا اور بھارت کے دفاعی تعلقات پہلے سے کہیں زیادہ مضبوط ہو چکے ہیں۔”
یہ معاہدہ کوالالمپور میں آسیان دفاعی وزرائے اجلاس کے موقع پر بھارتی وزیرِ دفاع راج ناتھ سنگھ اور پیٹ ہیگ کے درمیان طے پایا۔ امریکی وزیرِ دفاع نے اسے “تاریخی قدم” قرار دیتے ہوئے کہا کہ یہ تعاون خطے میں امن، استحکام اور طاقت کے توازن کے لیے اہم کردار ادا کرے گا۔
یہ پیش رفت ایسے وقت میں سامنے آئی ہے جب دونوں ممالک کے وزرائے خارجہ نے بھی حال ہی میں دوطرفہ تعلقات اور خطے کی سلامتی پر مشاورت کی۔
