شمالی کوریا کے رہنما کم جونگ اُن نے روس کو یوکرین کی جنگ میں اپنی “غیر مشروط حمایت” کا یقین دلایا ہے، جیسا کہ سرکاری میڈیا رپورٹس میں بتایا گیا ہے۔ روسی وزیر خارجہ سرگئی لاوروف سے ملاقات کے دوران کم جونگ اُن نے کہا کہ پیانگ یانگ “یوکرین بحران کی جڑ” سے نمٹنے کے لیے روسی قیادت کے تمام اقدامات کی مکمل حمایت کرتا ہے۔
مغربی حکام کا کہنا ہے کہ گزشتہ ایک سال کے دوران شمالی کوریا نے تقریباً 11 ہزار فوجی روس بھیجے ہیں تاکہ وہ یوکرین کے خلاف لڑائی میں حصہ لے سکیں۔ یہ بات شمالی کوریا نے رواں سال اپریل میں پہلی بار سرکاری طور پر تسلیم کی تھی۔
کم جونگ اُن اور لاوروف کی ملاقات کو شمالی کوریا کے سرکاری میڈیا کے سی این اے نے “دوستانہ اور رفیقانہ اعتماد” سے بھرپور قرار دیا۔ کم نے روسی عوام اور فوج پر مکمل اعتماد کا اظہار کرتے ہوئے کہا کہ وہ “ملک کی عظمت اور بنیادی مفادات کے تحفظ” کی جدوجہد میں لازمی کامیاب ہوں گے۔
روسی وزارت خارجہ نے ٹیلی گرام پر ایک ویڈیو جاری کی جس میں دونوں رہنما ہاتھ ملا رہے ہیں اور گلے مل رہے ہیں۔
یہ حمایت ایسے وقت میں سامنے آئی ہے جب امریکی صدر ڈونلڈ ٹرمپ نے یوکرین کو فوجی امداد دوبارہ شروع کر دی ہے۔ ٹرمپ نے این بی سی نیوز کو بتایا کہ انہوں نے نیٹو کے ساتھ ایک معاہدہ کیا ہے جس کے تحت امریکہ پیٹریاٹ فضائی دفاعی نظام یوکرین کو فراہم کرے گا۔
کم جونگ اُن اور صدر ولادیمیر پوٹن نے جون 2024 میں ایک معاہدہ کیا تھا جس میں دونوں ممالک نے ایک دوسرے کی “جارحیت کی صورت میں مدد” کا وعدہ کیا تھا۔ اس کے علاوہ، شمالی کوریا نے روس کے جنگ زدہ کورسک علاقے کی تعمیر نو میں مدد کے لیے ہزاروں مزدور بھی بھیجنے کی پیشکش کی ہے۔
