پاکستان کے معاشی حالات میں بہتری کے آثار نظر آ رہے ہیں لیکن ملک ابھی خطرے سے باہر نہیں ہے۔ مثال کے طور پر، گزشتہ چار مہینوں سے، سی پی آئی کی بنیاد پر مہنگائی نیچے کی جانب گامزن ہے، جیسا کہ اسٹیٹ بینک اور کثیر جہتی قرض دہندگان نے توقع کی تھی۔ اپریل میں مہنگائی 17.3 فیصد کی دو سال کی کم ترین سطح پر آ گئی۔ رواں مالی سال کی اوسط مہنگائی گزشتہ سال کے 29.6 فیصد سے کم ہو کر 26 فیصد رہنے کی پیش گوئی کی گئی ہے۔ اس کے باوجود شرح سود نمایاں طور پر بلند ہے کیونکہ اگلے بجٹ میں متوقع مالی استحکام اور توانائی کے شعبے میں اصلاحات کی وجہ سے افراط زر کے دوبارہ سر اٹھانے کا خدشہ مرکزی بینک کو ستا رہا ہے۔
کرنٹ اکاؤنٹ بیلنس میں بھی پچھلے 10 مہینوں میں بہتری آئی ہے، بین الاقوامی ذخائر میں اضافہ ہوا ہے کیونکہ ایک مضبوط ڈالر کے باوجود شرح مبادلہ مستحکم ہے جس نے حال ہی میں بیشتر ایشیائی کرنسیوں کو نقصان پہنچایا ہے۔ پھر بھی، درآمدات پر ’غیر سرکاری کنٹرول‘ برقرار ہے تاکہ غیر ملکی کرنسی کے ذخائر اور شرح مبادلہ پر مانگ کے دباؤ میں اچانک اضافہ کو روکا جا سکے۔ سخت مالی حالات اور غیر ملکی زرمبادلہ کی کمی نے بہت سے بڑے پیمانے پر مینوفیکچررز کو پیداوار میں زبردست کمی کرنے پر مجبور کیا، جس کے نتیجے میں ملازمتوں کا نقصان ہوا۔
اس تناظر میں وزیر اعظم شہباز شریف کا مہنگائی کے خلاف جیت کا حالیہ اعلان قبل از وقت لگتا ہے۔ نیا ’معاشی استحکام‘ ابھی تک نازک ہے اور مہنگائی کے خلاف جنگ جیتنے سے بہت دور ہے۔ یہ کہ حکومت شدت سے آئی ایم ایف سے درمیانی مدت کے مالیاتی فنڈکی تلاش میں ہے، جو سراسر اس بات کی علامت ہے کہ معیشت اچھی حالت میں نہیں ہے۔ مالیاتی استحکام اور آئی ایم ایف کے نئے پروگرام کے تحت توانائی کے شعبے کے کارپوریٹ قرضوں کے تیزی سے حل سے مستقبل قریب میں مہنگائی کی شرح بلند رہنے کا امکان ہے۔ درمیانی آمدنی والے گھرانوں کے لیے پچھلے چند سال بہت مشکل رہے ہیں، وہ اب بھی صورتحال سے خوش دکھائی نہیں دے رہے۔ اگلے چند سال بھی اکثریت کے لیے آسان نہیں ہوں گے۔ سیاست دانوں اور پالیسی سازوں کے لیے یہ ضروری ہے کہ وہ معاشی صورتحال کو غلط نہ سمجھیں اور کسی بھی ایسی غلطی سے گریز کریں جو لوگوں کی حالت زار کو مزید خراب کر سکے۔
Don’t forget to Subscribe our Youtube Channel & Press Bell Icon.
