پاکستان تحریک انصاف (پی ٹی آئی) کی سیاسی کمیٹی نے فیصلہ کیا ہے کہ پارٹی آئندہ ضمنی انتخابات میں بھرپور طریقے سے حصہ لے گی تاکہ سیاسی میدان میں اپنی موجودگی کو یقینی بنایا جا سکے۔
پارٹی ذرائع کے مطابق یہ فیصلہ کور کمیٹی کے اجلاس میں کیا گیا جس کی صدارت سینئر رہنما سلمان اکرم راجہ نے کی۔ اجلاس میں اتفاق کیا گیا کہ پی ٹی آئی کسی بھی سیاسی فورم کو خالی نہیں چھوڑے گی اور انتخابی عمل میں سرگرم کردار ادا کرے گی۔
کمیٹی نے مزید سفارش کی کہ جہاں پارٹی کا رکن عدالتی فیصلے یا سزا کے باعث نااہل قرار دیا جائے، وہاں متبادل امیدوار اسی رکن کی مشاورت سے سامنے لایا جائے تاکہ سیاسی تسلسل قائم رہے۔
اجلاس میں اپوزیشن لیڈر کی نامزدگی پر بھی مشاورت ہوئی، تاہم کمیٹی نے اس معاملے کو عدالتی فیصلے تک مؤخر کرنے کی تجویز دی۔ ذرائع کے مطابق یہ بھی کہا گیا کہ اپوزیشن لیڈر کی نامزدگی پی ٹی آئی کے اندر سے ہی ہونی چاہیے تاکہ قیادت کا تسلسل اور پارٹی کی شناخت برقرار رہے۔
مزید برآں، کمیٹی کے اکثر اراکین نے محمود خان اچکزئی کو اپوزیشن لیڈر نامزد کرنے کی مخالفت کی اور اس بات پر زور دیا کہ نئی قیادت کا فیصلہ موجودہ عدالتی عمل مکمل ہونے کے بعد ہی کیا جائے۔
