ماسکو: روسی وزارتِ دفاع کے مطابق، روس نے اتوار اور پیر کی درمیانی رات یوکرین کے 162 ڈرونز کو فضاء میں ہی روک کر تباہ کر دیا۔ یہ کارروائی اُس وقت ہوئی جب یوکرین اور روس کے درمیان ترکیہ میں براہِ راست مذاکرات کے دوسرے مرحلے کا آغاز ہونے والا تھا۔
وزارت نے ایک بیان میں کہا کہ “اتوار کو شام 5:10 بجے سے رات 11 بجے (جی ایم ٹی) کے دوران، روسی فضائی دفاعی نظام نے یوکرین کے 162 ڈرونز کا سراغ لگایا اور انہیں کامیابی سے تباہ کر دیا۔”
ان میں سے زیادہ تر ڈرونز یوکرین سے ملحق روسی سرحدی علاقوں میں گرائے گئے، جن میں کورسک کے علاقے میں 57 اور بیل گورود میں 31 ڈرونز شامل ہیں۔
علاقائی حکام کے مطابق، روسی حملوں کے نتیجے میں زاپوریزیا میں کم از کم پانچ افراد جان سے گئے، جبکہ خارکیف میں متعدد شہری زخمی ہوئے۔
یہ ڈرون حملے ایسے وقت میں ہوئے جب روس اور یوکرین کے نمائندے استنبول میں مذاکرات کی میز پر بیٹھنے والے تھے — یہ دونوں ممالک کے درمیان فروری 2022 میں جنگ کے آغاز کے بعد دوسرا براہِ راست مکالمہ تھا۔
اس واقعے سے ایک روز قبل، یوکرین نے روسی سرزمین کے اندر گہرائی میں واقع فضائی اڈوں پر ایک جری اور مؤثر حملے کا دعویٰ کیا، جس میں درجنوں بمبار طیاروں کو نشانہ بنایا گیا. یہ طیارے محاذِ جنگ سے ہزاروں کلومیٹر دور پارک کیے گئے تھے۔
