امریکا نے شام میں داعش کے خلاف بڑے پیمانے پر فضائی حملے شروع کر دیے ہیں، جن میں امریکی لڑاکا طیارے اور ہیلی کاپٹر وسطی شام میں متعدد اہداف کو نشانہ بنا رہے ہیں۔
میڈیا رپورٹ کے مطابق یہ کارروائیاں اس وقت کی گئی ہیں جب حال ہی میں شام میں امریکی افواج پر حملہ ہوا تھا، جس میں دو امریکی فوجی اور ایک سول مترجم ہلاک ہوئے تھے۔ امریکی وزیر دفاع پیٹ نے بتایا کہ “آپریشن ہاک آئی اسٹرائیک” کا مقصد داعش کے بنیادی ڈھانچے، ہتھیاروں اور فوجی تنصیبات کو تباہ کرنا ہے۔
صدر ڈونلڈ ٹرمپ نے فضائی حملوں کے بعد اپنے سوشل میڈیا پلیٹ فارم “ٹروتھ سوشل” پر بیان جاری کیا کہ شام میں داعش کے ٹھکانوں پر حملے جاری ہیں اور شامی حکومت امریکی کارروائیوں کی مکمل حمایت کر رہی ہے۔ انہوں نے کہا کہ داعش کے خلاف امریکا نے وعدے کے مطابق جوابی کارروائیاں تیز کر دی ہیں اور امریکا پر حملہ کرنے والوں کو پہلے سے زیادہ سخت جواب دیا جائے گا۔
شامی حکومت نے بھی اعلان کیا ہے کہ وہ داعش کے خلاف اپنے فوجی آپریشنز جاری رکھے گی۔ امریکی سینٹرل کمانڈ کے مطابق گزشتہ حملے میں شامل حملہ آور کو فورسز نے جوابی کارروائی میں ہلاک کر دیا تھا، جبکہ حملے میں تین امریکی ہلاک اور تین زخمی ہوئے تھے۔
یہ فضائی کارروائیاں اس بات کی عکاسی کرتی ہیں کہ امریکا شام میں داعش کے خلاف اپنی فوجی مہم کو مزید فعال بنا رہا ہے اور خطے میں استحکام کے لیے سخت اقدامات کر رہا ہے۔
