ایران نے ستمبر میں قاہرہ میں عالمی جوہری ادارے کے ساتھ طے پانے والے معاہدے کو باضابطہ طور پر ختم کرنے کا اعلان کر دیا ہے۔ یہ اقدام ایران اور عالمی ادارے کے درمیان موجود حالیہ کشیدگی اور اختلافات کے تناظر میں سامنے آیا ہے۔
ایرانی وزیرِ خارجہ عباس عراقچی کی جانب سے آئی اے ای اے کے ڈائریکٹر جنرل کو بھیجے گئے سرکاری مراسلے میں واضح کیا گیا کہ قاہرہ سمجھوتہ اب قابل اعتبار نہیں رہا اور اسے مکمل طور پر ختم تصور کیا جائے۔ انہوں نے کہا کہ موجودہ حالات میں اس سمجھوتے پر عمل درآمد ایران کے لیے ممکن نہیں رہا، اور یہ اب دونوں فریقوں کے تعلقات اور تعاون کی بنیاد نہیں رہا۔
عباس عراقچی نے مزید کہا کہ سلامتی کونسل میں تین یورپی ممالک کی جانب سے سابقہ منسوخ شدہ قراردادوں کی بحالی کے غیر قانونی اقدامات نے ایران اور عالمی ادارے کے درمیان تعلقات پر منفی اثرات ڈالے ہیں۔ ان کا کہنا تھا کہ یہ ممالک عالمی ادارے کی آزادی اور حیثیت کو داؤ پر لگا رہے ہیں اور اس کے ساتھ تعاون کے عمل کو بھی متاثر کر رہے ہیں۔
ایران کے مؤقف کے مطابق، عالمی ادارے کے ساتھ تعاون کی بنیاد صرف باہمی اعتماد اور قانونی فریم ورک پر ہو سکتی ہے، اور موجودہ اقدامات نے اس اعتماد کو کمزور کر دیا ہے۔ عباس عراقچی نے زور دیا کہ ایران اپنی قومی اور قانونی پالیسیوں کے مطابق اپنے جوہری پروگرام کے تحفظ کے لیے اقدامات جاری رکھے گا۔
