امریکی صدر ڈونلڈ ٹرمپ نے ورلڈ اکنامک فورم کے موقع پر ڈیوس میں خطاب کرتے ہوئے دعویٰ کیا ہے کہ اقتدار میں واپسی کے بعد انہوں نے آٹھ جنگوں کا خاتمہ کر دیا ہے اور عالمی سطح پر کشیدگی میں نمایاں کمی لائی ہے۔
صدر ٹرمپ نے ایران کے حوالے سے کہا کہ گزشتہ سال جون میں ایرانی جوہری تنصیبات پر کیے گئے امریکی حملے ایران کی جوہری صلاحیت کو مکمل طور پر ختم کرنے میں مؤثر ثابت ہوئے۔ ان کے مطابق ایران اب مذاکرات کے لیے آمادہ ہے اور امریکا کے ساتھ بات چیت کی طرف راغب ہو رہا ہے۔
شام میں داعش کے خلاف امریکی کارروائیوں کا ذکر کرتے ہوئے صدر ٹرمپ نے کہا کہ خطے میں حالات میں بہتری آئی ہے اور یورپ، امریکا اور مشرقِ وسطیٰ کو لاحق سکیورٹی خطرات میں کمی دیکھنے کو ملی ہے۔ ان کا کہنا تھا کہ ایک سال قبل عالمی منظرنامہ شدید بحران کا شکار تھا، لیکن اب صورتحال نسبتاً مستحکم ہے۔
اسی دوران صدر ٹرمپ نے اپنے مجوزہ عالمی فورم، ’بورڈ آف پیس‘، کا باقاعدہ اعلان بھی کیا۔ انہوں نے بتایا کہ اس فورم کا مقصد بین الاقوامی تنازعات کے مؤثر حل کے لیے ایک پلیٹ فارم فراہم کرنا ہے۔
صدر ٹرمپ کے مطابق 59 ممالک مشرقِ وسطیٰ میں امن کی کوششوں میں شامل ہیں اور متعدد عالمی رہنما اس فورم میں شمولیت کے خواہاں ہیں۔ بعد ازاں انہوں نے ڈیوس میں بورڈ آف پیس کے چارٹر پر دستخط کیے، جس میں بحرین اور مراکش کے رہنما بھی موجود تھے۔
دستاویزات پر دستخط کے بعد صدر ٹرمپ نے انہیں میڈیا کے سامنے پیش کیا اور دیگر عالمی رہنما بھی باری باری چارٹر پر دستخط کرنے کے لیے آئے۔
غزہ کے معاملے پر بات کرتے ہوئے صدر ٹرمپ نے خبردار کیا کہ اگر حماس ہتھیار نہ ڈالے تو صورتحال سنگین ہو سکتی ہے۔ انہوں نے واضح کیا کہ امریکا اقوامِ متحدہ اور دیگر عالمی اداروں کے تعاون سے امن کے لیے اقدامات جاری رکھے گا۔
