امریکی صدر ڈونلڈ ٹرمپ نے فیلڈ مارشل عاصم منیر کے لیے اپنی خصوصی پسندیدگی کا اظہار کرتے ہوئے انہیں اپنا پسندیدہ فیلڈ مارشل قرار دیا۔
شرم الشیخ میں میڈیا نمائندوں سے گفتگو کے دوران صدر ٹرمپ نے کہا کہ ’’وزیر اعظم پاکستان شہباز شریف یہاں موجود ہیں، البتہ فیلڈ مارشل عاصم منیر آج ہمارے ساتھ نہیں۔‘‘
اس موقع پر صدر ٹرمپ نے مسکراتے ہوئے وزیر اعظم شہباز شریف کی طرف رخ کیا اور کہا کہ ’’براہ کرم فیلڈ مارشل عاصم منیر کو میرا سلام پہنچا دیں۔
امریکی صدر نے مزید کہا کہ ان کی خواہش ہے کہ بھارت اور پاکستان بہترین ہمسائے بن کر پرامن انداز میں رہیں اور خطے میں ترقی و استحکام کے لیے تعاون بڑھائیں۔
دوسری جانب وزیر اعظم شہباز شریف نے مصر کے شہر شرم الشیخ میں پریس کانفرنس کے دوران اعلان کیا کہ پاکستان نے صدر ٹرمپ کو امن کے نوبیل انعام کے لیے نامزد کیا ہے۔
ان کا کہنا تھا کہ صدر ڈونلڈ ٹرمپ نہ صرف امن کے لیے قابلِ ستائش کردار ادا کر رہے ہیں بلکہ ان کی کوششوں سے لاکھوں انسانی زندگیاں محفوظ ہوئی ہیں، اس لیے وہ نوبیل انعام کے سب سے زیادہ مستحق ہیں۔
