امریکی صدر ڈونلڈ ٹرمپ نے اعلان کیا ہے کہ روس کے ساتھ ہونے والی ملاقات کے بعد ماسکو سے تیل اور گیس خریدنے والے ممالک پر پابندیاں عائد کرنے کا فیصلہ کیا جائے گا۔
واشنگٹن میں میڈیا سے گفتگو کرتے ہوئے ٹرمپ نے بتایا کہ ان کے خصوصی ایلچی، اسٹیو وِٹکوف، آج ماسکو میں روسی قیادت سے اہم ملاقات کریں گے۔ انہوں نے دعویٰ کیا کہ وہ پاک بھارت سمیت کئی تنازعات کو رکوا چکے ہیں۔
ٹرمپ نے مزید کہا کہ امریکہ غزہ میں متاثرہ افراد کو کھانا فراہم کرنے کی کوشش کر رہا ہے، جس میں اسرائیل لاجسٹک مدد دے گا جبکہ عرب ریاستیں مالی معاونت فراہم کریں گی۔
اس سے قبل امریکی صدر بھارت کو چوبیس گھنٹوں میں مزید تجارتی ٹیرف لگانے کی دھمکی دے چکے ہیں۔ ان کا کہنا تھا کہ انہیں بھارت کی روس سے تیل کی خریداری پر شدید تحفظات ہیں، کیونکہ یہ اقدام یوکرین میں روس کی جنگی مشین کو تقویت فراہم کر رہا ہے۔
امریکی صدر اس سے چند روز قبل بھارتی درآمدات پر پچیس فیصد ٹیرف اور ایک فیصد اضافی جرمانہ بھی عائد کر چکے ہیں، اور بھارتی معیشت کو “مردہ معیشت” قرار دے چکے ہیں۔
