مقبوضہ مغربی کنارے میں اسرائیلی فورسز کی فائرنگ سے دو فلسطینی شہری شہید ہو گئے ہیں۔ عرب میڈیا کے مطابق فلسطینی ٹی وی نے وہ مناظر نشر کیے جن میں دکھایا گیا کہ اسرائیلی فورسز نے ان دونوں غیرمسلح فلسطینیوں کو اس وقت ہلاک کیا جب وہ فوج کے کہنے پر تعاون کرنے کے لیے تیار تھے۔
اس واقعے کے بعد اسرائیل نے شمالی مغربی کنارے میں بڑے پیمانے پر انسداد دہشت گردی آپریشن شروع کیا اور جزوی کرفیو نافذ کر دیا۔ اس افسوسناک واقعے پر اسرائیلی پولیس اور فوج نے مشترکہ اعلامیہ جاری کیا ہے جس میں بتایا گیا کہ جنین شہر میں دو فلسطینی شہریوں کے قتل کے حوالے سے تحقیقات کا عمل شروع کر دیا گیا ہے۔
فلسطینی وزارت صحت کے مطابق شہید ہونے والے فلسطینی شہریوں کی شناخت 26 سالہ المنتاثر باللہ اور 37 سالہ یوسف کے نام سے کی گئی ہے۔ واقعے نے مقبوضہ علاقے میں کشیدگی اور عوامی غم و غصے کو مزید بڑھا دیا ہے، جبکہ عالمی برادری کی طرف سے بھی اس پر تشویش کا اظہار کیا گیا ہے۔
