اقوامِ متحدہ کی سلامتی کونسل میں صدر ٹرمپ کے 20 نکاتی غزہ منصوبے کی حمایت میں قرارداد منظور کر لی گئی، جس کے حق میں پاکستان سمیت 13 ممالک نے ووٹ دیا۔ تاہم چین اور روس نے ووٹنگ میں حصہ نہیں لیا اور منصوبے پر شدید تحفظات کا اظہار کیا۔ دونوں ممالک کا کہنا ہے کہ غزہ فلسطینی عوام کا ہے اور کسی اور کے لیے نہیں ہونا چاہیے۔
چینی سفیر فو کونگ نے وضاحت دی کہ قرارداد فلسطینی حکمرانی کے اصولوں کی مکمل عکاسی نہیں کرتی اور امریکا نے انٹرنیشنل اسٹیبلائزیشن فورس اور بورڈ آف پیس کی تفصیلات فراہم نہیں کیں۔ روسی مندوب نے بھی کہا کہ منصوبہ فلسطینیوں کو عمل سے باہر رکھتا ہے اور غزہ و مغربی کنارے کی تقسیم کے خطرات بڑھا سکتا ہے۔
دوسری جانب برطانیہ، فرانس، جنوبی کوریا اور سلووینیا نے منصوبے کی تائید کی، جبکہ ڈنمارک نے زور دیا کہ غزہ اور مغربی کنارے کو متحد رکھنا ضروری ہے۔
