امریکا نے وینزویلا کے صدر نکولس مادورو کو گرفتار کرنے سے کئی ماہ قبل وینزویلا کے وزیر داخلہ، ڈیوسڈا ڈو کابیلو، سے خفیہ مذاکرات کیے۔ تاہم، کابیلو کو اسی مقدمے میں مطلوب ہونے کے باوجود گرفتار نہیں کیا گیا، جس میں بعد میں مادورو کو گرفتار کیا گیا۔
رائٹرز کے مطابق، کابیلو صدر مادورو کے وفادار سمجھے جاتے تھے اور امریکا نے انہیں یہ یقین دلانے کی کوشش کی کہ مادورو کی گرفتاری کے بعد وہ اپنے زیرِ اثر حفاظتی اداروں، انٹیلی جنس سروسز اور مسلح حکومتی حامیوں کو اپوزیشن کے خلاف استعمال نہ کریں۔
واضح رہے کہ 3 جنوری کو امریکی فورسز نے وینزویلا میں کارروائی کرتے ہوئے صدر مادورو اور ان کی اہلیہ کو ان کے بیڈروم سے گرفتار کر کے امریکا منتقل کر دیا۔ گرفتاری کے بعد، ان کے خلاف منشیات اسمگلنگ کے الزامات کے تحت قانونی کارروائی کا آغاز کیا گیا۔
یہ اقدام امریکی حکومت کی طرف سے مادورو کے خلاف طویل منصوبہ بندی کا حصہ تھا، جس میں وینزویلا کے اندر اہم سیاسی کرداروں کے ساتھ خفیہ رابطے بھی شامل تھے تاکہ گرفتاری کے بعد ملک میں طاقت کے توازن پر قابو پایا جا سکے۔
