نگراں وزیراعظم انوار الحق کاکڑ نے ملک میں آزادانہ، منصفانہ اور شفاف انتخابات کو یقینی بنانے کے لیے حکومت کے عزم کا اعادہ کیا ہے۔
ایک نجی ٹی وی کو انٹرویو دیتے ہوئے انہوں نے کہا کہ عبوری حکومت چاہتی ہے کہ عوام آئندہ انتخابات میں اپنے جمہوری حق کا استعمال کرتے ہوئے اپنے نمائندے منتخب کریں۔ انہوں نے کہا کہ عبوری حکومت منتخب حکومت کو ذمہ داریاں سونپنا چاہتی ہے۔
غیر قانونی غیر ملکی شہریوں کی ملک بدری کے معاملے پر بات کرتے ہوئے وزیر اعظم نے اس بات کی تصدیق کی کہ وطن واپسی کے عمل کو انتہائی احترام اور وقار کے ساتھ انجام دیا جا رہا ہے، ان کی وطن واپسی کو یقینی بنایا جا رہا ہے۔
Don’t forget to Subscribe our Youtube Channel & Press Bell Icon.
ایک اور سوال کے جواب میں وزیراعظم نے افغان عبوری حکومت پر زور دیا کہ وہ اپنی سرزمین پر دہشت گردی کی سرگرمیوں کو روکنے کے لیے عملی اقدامات کرے۔ انہوں نے افغان حکومت سے کہا کہ وہ اس بات کو یقینی بنائے کہ اس کی سرزمین پاکستان سمیت کسی بھی ملک کے خلاف دہشت گردی کے لیے استعمال نہ ہو۔ انہوں نے دہشت گرد عناصر کے خلاف کارروائیوں میں پاکستان کی سکیورٹی فورسز کی انتھک کوششوں کو بھی سراہا۔
پاک افغان تعلقات پر روشنی ڈالتے ہوئے وزیراعظم نے علاقائی استحکام کے ماحول کو فروغ دیتے ہوئے تمام پڑوسی ممالک کے ساتھ پرامن بقائے باہمی کے پاکستان کے عزم پر زور دیا۔
