راولپنڈی: چیف آف آرمی اسٹاف اور چیف آف ڈیفنس اسٹاف فیلڈ مارشل عاصم منیر نے کہا ہے کہ پاکستان اور چین کی دوستی “منفرد، آزمودہ اور وقت کی ہر کسوٹی پر پوری اترنے والی ہے، جو بدلتے ہوئے علاقائی اور عالمی چیلنجز کے باوجود ہمیشہ مضبوط رہی ہے۔”
پاک فوج کے شعبہ تعلقات عامہ (آئی ایس پی آر) کے مطابق، فیلڈ مارشل عاصم منیر نے یہ بات جنرل ہیڈکوارٹرز (جی ایچ کیو) راولپنڈی میں چین کی پیپلز لبریشن آرمی (پی ایل اے) کے قیام کی 99ویں سالگرہ کے موقع پر منعقدہ تقریب سے خطاب کرتے ہوئے کہی۔
تقریب میں پاکستان میں چین کے سفیر جیانگ زائی ڈونگ مہمانِ خصوصی تھے، جبکہ چین کے دفاعی اتاشی میجر جنرل وانگ ژونگ، چینی سفارت خانے کے حکام اور پاکستان کی تینوں مسلح افواج کے سینئر افسران بھی شریک ہوئے۔
آئی ایس پی آر کے مطابق، فیلڈ مارشل عاصم منیر نے مہمانوں کا خیرمقدم کرتے ہوئے پیپلز لبریشن آرمی کو اس کے یومِ تاسیس پر مبارکباد پیش کی اور چین کے دفاع، قومی ترقی اور عالمی امن و سلامتی کے لیے اس کی خدمات کو خراجِ تحسین پیش کیا۔
انہوں نے کہا کہ پاکستان اور چین کے تعلقات باہمی اعتماد، غیر متزلزل تعاون اور مشترکہ اسٹریٹجک مفادات پر استوار ہیں۔ دونوں ممالک کی مسلح افواج حقیقی شراکت دار ہیں اور خطے میں امن، استحکام اور مشترکہ مفادات کے تحفظ کے لیے مل کر کام کرتی رہیں گی۔
حقیقی شراکت دار
چین کے سفیر نے تقریب کے انعقاد پر فیلڈ مارشل عاصم منیر کا شکریہ ادا کیا اور دہشت گردی کے خلاف جنگ میں پاکستان کی مسلح افواج کی قربانیوں کو سراہا۔ انہوں نے پاکستان کے لیے چین کی مسلسل حمایت اور دونوں ممالک کے درمیان ہر موسم میں قائم رہنے والی اسٹریٹجک تعاون پر مبنی شراکت داری کو مزید مضبوط بنانے کے عزم کا اعادہ بھی کیا۔
گزشتہ سال بھی جی ایچ کیو میں منعقدہ اسی تقریب سے خطاب کرتے ہوئے فیلڈ مارشل عاصم منیر نے کہا تھا کہ پاکستان اور چین کی دیرینہ شراکت داری خطے کے امن اور استحکام میں کلیدی کردار ادا کرتی رہے گی۔
پاکستان اور چین کے درمیان کئی دہائیوں پر محیط اسٹریٹجک تعلقات باہمی اعتماد، اقتصادی تعاون اور علاقائی روابط پر مبنی ہیں۔ تجارت، توانائی، دفاع اور بنیادی ڈھانچے سمیت مختلف شعبوں میں دونوں ممالک کا تعاون مسلسل فروغ پا رہا ہے، جبکہ چین پاکستان اقتصادی راہداری (سی پیک) دونوں ممالک کے مشترکہ ترقیاتی وژن کی نمایاں علامت ہے۔
