لاہور: ریپبلک پالیسی کی حال ہی میں شائع ہونے والی کتاب ’بیونڈ فور پروونسز: وائی پاکستان نیڈز فیڈرل یونٹس، ناٹ ایڈمنسٹریٹو یونٹس‘ کی تقریبِ رونمائی المورد سوسائٹی، ماڈل ٹاؤن لاہور میں منعقد ہوئی۔ تقریب میں طلبہ و طالبات، عزیز و اقارب اور میڈیا سے وابستہ شخصیات نے شرکت کی۔
کتاب کے مصنف طارق محمود اعوان نے اپنے خطاب میں کتاب کا بنیادی خاکہ اور استدلال پیش کرتے ہوئے کہا کہ پاکستان کو دو اہم مسائل درپیش ہیں: وفاقیت اور گورننس۔ ان کے مطابق ملک کی ترقی کا انحصار ان دونوں مسائل کے حل پر ہے، تاہم انہیں ایک دوسرے سے الگ سمجھنا ضروری ہے۔
انہوں نے وضاحت کی کہ وفاقی اکائیوں کی تشکیل میں ثقافتی شناخت بنیادی اہمیت رکھتی ہے۔ اس تناظر میں انہوں نے ہزارہ اور جنوبی پنجاب جیسی نئی وفاقی اکائیوں کے قیام کی حمایت کی، تاہم ان کا کہنا تھا کہ محض نئی وفاقی اکائیاں بنانے سے گورننس بہتر ہونے کی توقع رکھنا درست نہیں۔
طارق محمود اعوان کے مطابق گورننس میں بہتری کے لیے مؤثر انتظامی اکائیوں، مقامی حکومتوں اور شہری حکومتوں کا قیام ضروری ہے، جن کی تشکیل میں آبادی اور انتظامی ضروریات کو پیشِ نظر رکھا جائے۔
تقریب کے اختتام پر انہوں نے طلبہ کے سوالات کے جواب بھی دیے۔ ایک سوال کے جواب میں ان کا کہنا تھا کہ کسی ایک سرکاری افسر سے موجودہ نظام تبدیل کرنے کی توقع رکھنا حقیقت پسندانہ نہیں۔ اصلاحات کے لیے شخصیات کے بجائے نظام اور ادارہ جاتی ڈھانچے پر توجہ دینا ہوگی۔
کتاب ’بیونڈ فور پروونسز‘ خریداری کے لیے دستیاب ہے۔ مزید معلومات اور آرڈر کے لیے ریپبلک پالیسی سے واٹس ایپ نمبر 0341-4222501 پر رابطہ کیا جا سکتا ہے۔
