ظفر اقبال
جون 2025 میں پاکستان میں صارف قیمت اشاریہ میں مئی کے مقابلے میں معمولی کمی دیکھی گئی ہے، جہاں مہنگائی کی شرح 3.5 فیصد سے کم ہو کر 3.2 فیصد ریکارڈ کی گئی۔ پاکستان بیورو آف اسٹی ٹکس کے جاری کردہ تازہ ترین اعداد و شمار کے مطابق اس کمی کی ایک بڑی وجہ درآمد شدہ افراطِ زر میں وقتی کمی ہے۔ تاہم یہ کمی کوئی بنیادی بہتری کی علامت نہیں، بلکہ ایسے عارضی عوامل کا نتیجہ ہے جنہیں پائیدار معاشی بہتری سے تعبیر نہیں کیا جا سکتا۔
سی پی آئی میں اُن اشیاء کی قیمتوں کو مدنظر رکھا جاتا ہے جو بیرونِ ملک سے درآمد کی جاتی ہیں، یا جن کی مقامی پیداوار کے لیے درآمدی خام مال ضروری ہوتا ہے۔ ان اشیاء کی قیمتوں میں کمی یا اضافہ عموماً شرحِ تبادلہ اور بالواسطہ ٹیکسوں، خصوصاً پٹرولیم مصنوعات پر عائد لیوی اور حالیہ کاربن ٹیکس، سے منسلک ہوتا ہے۔ یہ تمام عناصر پاکستان میں اشیاء و خدمات کی ترسیل کی لاگت کو براہِ راست متاثر کرتے ہیں، اور یوں مہنگائی کی سطح پر بھی اثر انداز ہوتے ہیں۔
گزشتہ ایک سال کے دوران شرحِ تبادلہ مستحکم رہی ہے، جس کے پیچھے بین الاقوامی مالیاتی فنڈ کا مسلسل یہ مؤقف ہے کہ “لچکدار شرحِ تبادلہ بیرونی جھٹکوں کو جذب کرنے اور زرمبادلہ کے ذخائر کی بحالی کے لیے ناگزیر ہے۔” اگرچہ بینکنگ اور اوپن مارکیٹ ریٹس کے درمیان فرق آئی ایم ایف کی ہدایات کے مطابق موجود ہے، تاہم مارکیٹ میں یہ تشویش پائی جاتی ہے کہ حکومت روپے کی قدر کو مصنوعی طور پر سنبھالے ہوئے ہے۔ اس مفروضے کو اس حقیقت سے بھی تقویت ملتی ہے کہ ملک کے زرمبادلہ کے ذخائر مکمل طور پر قرضوں پر مشتمل ہیں — جن میں دوست ممالک سے حاصل کردہ سولہ ارب ڈالر کے رول اوورز بھی شامل ہیں، جبکہ 20 جون 2025 کو دستیاب ذخائر صرف 9.06 ارب ڈالر تھے۔
پاکستان بیورو آف اسٹی ٹکس کی طرف سے جاری کردہ تفصیلات کے مطابق، توانائی، پانی، بجلی، گیس اور ایندھن سمیت دیگر یوٹیلیٹی اشیاء کو سی پی آئی کے تعین میں 23.63 فیصد وزن دیا گیا ہے۔ تاہم حیران کن طور پر، مائع ہائیڈروکاربنز (یعنی خام تیل و پٹرولیم مصنوعات) کو محض 0.9994 کا وزن دیا گیا، جبکہ ٹھوس ایندھن جیسے لکڑی، کوئلہ، گوبر اور دیگر روایتی ایندھن کو اس سے چار گنا زیادہ یعنی 4.4761 کا وزن دیا گیا۔ یہ تناسب زمینی حقائق سے ہم آہنگ نہیں اور ممکنہ طور پر اسی وجہ سے آئی ایم ایف نے اکتوبر 2024 کی اپنی اسٹاف رپورٹ میں ڈیٹا کی درستگی پر سوالات اٹھائے۔ رپورٹ میں کہا گیا کہ “قومی اکاؤنٹس اور سرکاری مالیاتی اعداد و شمار میں خامیاں ہیں، جو آئی ایم ایف کی نگرانی کو متاثر کرتی ہیں، اور مجموعی قومی پیداوار کے ایک تہائی حصے سے متعلق بنیادی ڈیٹا میں اہم کمزوریاں موجود ہیں۔”
اسٹیٹ بینک کی مانیٹری پالیسی کمیٹی کی طرف سے پالیسی ریٹ کے تعین میں غیر خوراکی اور غیر توانائی اشیاء کو مرکزی اہمیت حاصل ہے۔ جون میں کور انفلی شن 6.8 فیصد ریکارڈ ہوئی، جو مئی میں 7.3 فیصد اور اپریل میں 8.2 فیصد تھی۔ تحریک انصاف کے دورِ حکومت میں، سے معاہدے کے تحت پالیسی ریٹ کو کور انفلیشن کے بجائے سی پی آئی سے منسلک کیا گیا تھا، لیکن موجودہ حکومت نے اس پر واپسی کی ہے یا نہیں، یہ واضح نہیں ہے۔ مثلاً، جنوری سے 5 مئی تک پالیسی ریٹ 12 فیصد رہا، جبکہ اپریل میں 0.3 فیصد تک آ گئی، اور پھر 5 مئی کو پالیسی ریٹ کو 11 فیصد کر دیا گیا — جس کے فوراً بعد مئی میں دوبارہ 3.5 فیصد ہو گئی، مگر کور انفلیشن صرف 0.1 فیصد پوائنٹ کم ہوئی۔ اس تضاد کے باعث آئی ایم ایف نے اسٹیٹ بینک کو مشورہ دیا ہے کہ پالیسی ریٹ کے فیصلے معاشی ڈیٹا کی بنیاد پر کیے جائیں تاکہ ان کی ساکھ میں اضافہ ہو۔
آئندہ مہینوں میں افراطِ زر میں اضافے کا خدشہ برقرار ہے، کیونکہ حکومت نے آئی ایم ایف سے کیے گئے معاہدے کے تحت یوٹیلیٹی نرخوں میں اضافہ، مکمل لاگت کی بنیاد پر قیمتوں کا تعین، اور سخت مالی و مانیٹری پالیسیوں پر عملدرآمد کا فیصلہ کیا ہے۔ تاہم یہ تمام اقدامات ایسے وقت میں کیے جا رہے ہیں جب ملک میں غربت کی شرح خطرناک حد تک بڑھ چکی ہے۔
ورلڈ بینک کے مطابق، پاکستان میں غربت کی شرح 44.2 فیصد تک پہنچ چکی ہے، جو سب صحارا افریقہ کی سطح سے بھی مماثلت رکھتی ہے۔ ایسی صورت حال میں حکومت کو صرف مہنگائی کنٹرول کرنے کی بجائے جامع فلاحی پالیسیوں پر توجہ دینی چاہیے، اور آئی ایم ایف کو قائل کرنا چاہیے کہ غربت سے نمٹنے کے لیے عملی، مؤثر اور شفاف اقدامات ضروری ہیں۔
خلاصہ یہ ہے کہ پاکستان میں مہنگائی کی حالیہ کمی محض ایک وقتی رجحان ہے، جو ساختی اصلاحات کی عدم موجودگی میں زیادہ دیر برقرار نہیں رہ سکتی۔ جب تک معاشی پالیسیاں غربت، غیر مساوی شرحِ ترقی، اور انتظامی نااہلی جیسے بنیادی مسائل کا حل پیش نہیں کرتیں، مہنگائی میں عارضی کمی عوامی مشکلات کو کم نہیں کر سکتی۔ مستقل معاشی بہتری کے لیے شفاف ڈیٹا، خودمختار پالیسی سازی، اور غربت کے خلاف بھرپور جدوجہد ضروری ہے — ورنہ مہنگائی کی ہر لہر کے ساتھ عوامی بوجھ میں اضافہ ہی ہوتا رہے گا۔
