پاکستان کی حکومت نے جموں و کشمیر کے تنازع پر بھارتی وزیرِ دفاع کے حالیہ بیان کی شدید ترین الفاظ میں مذمت کرتے ہوئے اسے نہایت اشتعال انگیز اور غیر ذمہ دارانہ قرار دیا ہے۔
دفترِ خارجہ کے ترجمان طاہر اندرابی نے اپنے بیان میں کہا کہ بھارتی وزیر کے ریمارکس بین الاقوامی سطح پر تسلیم شدہ جموں و کشمیر تنازع کے حقائق کو مسخ کرنے کی کوشش ہیں، جو اب بھی اقوامِ متحدہ کی سلامتی کونسل کے ایجنڈے پر موجود ہے۔ انہوں نے کہا کہ یہ بیان خطے اور عالمی امن و سلامتی کو خطرے میں ڈالنے کی دانستہ بھارتی پالیسی کی عکاسی کرتا ہے۔
ترجمان نے کہا کہ اس نوعیت کے بیانات کا مقصد بھارت کے غیر قانونی زیرِ قبضہ جموں و کشمیر پر مسلسل قبضے، خطے میں دہشت گردی کی سرپرستی اور ملک کے اندر بڑھتی ہوئی بے یقینی سے توجہ ہٹانا ہے۔
پاکستان نے عالمی برادری، بالخصوص اقوامِ متحدہ، سے مطالبہ کیا ہے کہ وہ بھارت کے مسلسل غیر ذمہ دارانہ طرزِ عمل کا نوٹس لے اور اسے سلامتی کونسل کی متعلقہ قراردادوں پر عمل درآمد نہ کرنے کے لیے جواب دہ ٹھہرائے۔ ان قراردادوں کے مطابق کشمیری عوام کو حقِ خودارادیت دیا جانا لازم ہے۔
