عالمی مالیاتی ادارے (آئی ایم ایف) کا وفد اقتصادی جائزے کے لیے آج پاکستان پہنچے گا۔
آئی ایم ایف کا 9 رکنی وفد نیتن پورٹر کی قیادت میں پیر کو تقریباً 2 ہفتے پاکستان میں قیام کرے گا۔ اور آئی ایم ایف کا وفد آئندہ مالی سال 26-2025 کے بجٹ کے لیے تجاویز بھی دے گا۔
ذرائع وزارت خزانہ کے مطابق آئی ایم ایف کے ساتھ اقتصادی جائزہ مذاکرات 15 مارچ تک جاری رہیں گے۔ پہلے مرحلے میں تکنیکی اور دوسرے مرحلے میں پالیسی سطح کے مذاکرات ہوں گے۔
آئی ایم ایف سے رضامندی کی صورت میں ہی تنخواہ دار طبقے کو ریلیف مل سکے گا۔ وفد کے وزارت خزانہ، وزارت توانائی، منصوبہ بندی اور اسٹیٹ بینک کے ساتھ مذاکرات ہوں گے۔
ذرائع کے مطابق آئی ایم ایف وفد کے ایف بی آر، اوگرا، نیپرا سمیت دیگر اداروں اور وزارتوں کے ساتھ بھی مذاکرات شیڈول ہیں۔ آئی ایم ایف وفد کے پنجاب، سندھ، خیبرپختونخوا اور بلوچستان سے الگ الگ مذاکرات ہوں گے۔
