لاہور — گجر پورہ کے علاقے میں جائیداد کے تنازع پر 80 سالہ والد کو مبینہ طور پر قتل کرنے کے الزام میں پولیس نے ایک شخص اور اس کی اہلیہ کو گرفتار کرلیا۔
پولیس ترجمان کے مطابق مقتول محمد عظیم کو مبینہ طور پر ان کے بیٹے نے گولی مار کر قتل کیا، جس کے بعد ملزمان موقع سے فرار ہوگئے تھے۔
ڈپٹی انسپکٹر جنرل انویسٹی گیشن لاہور سید ذیشان رضا نے واقعے کا نوٹس لیتے ہوئے پولیس کو ملزمان کا سراغ لگا کر انہیں گرفتار کرنے کی ہدایت کی۔
ترجمان کے مطابق گجر پورہ انویسٹی گیشن کے انچارج ممتاز حسین کی سربراہی میں پولیس ٹیم نے انسانی ذرائع سے حاصل ہونے والی معلومات اور دیگر تفتیشی طریقوں کی مدد سے ملزمان کو گرفتار کرلیا۔
سید ذیشان رضا نے بتایا کہ ملزمان پولیس کی حراست میں ہیں۔ انہوں نے تفتیشی افسران کو تحقیقات مکمل کرکے جامع چالان جمع کرانے کی ہدایت کی تاکہ ملزمان کے خلاف قانون کے مطابق کارروائی آگے بڑھائی جاسکے۔
ایس ایس پی محمد نوید نے ملزمان کو گرفتار کرنے والی پولیس ٹیم کے لیے تعریفی اسناد دینے کا اعلان کیا۔
