ترک صدر رجب طیب اردوان نے کہا ہے کہ پاکستان ترکی کا سچا اور مضبوط دوست ہے اور دونوں ممالک کے درمیان دوستی ہمیشہ قائم رہے گی۔ انہوں نے یقین دلایا کہ پاک ترک تعلقات وقت کے ساتھ مزید مستحکم اور مضبوط ہوں گے۔
ایک تقریب میں بحری جہازوں کی شمولیت کے حوالے سے خطاب کرتے ہوئے صدر اردوان نے بتایا کہ مکمل کامیاب تجربات کے بعد جدید جنگی جہاز “خیبر” پاکستان بحریہ کے حوالے کیے جا رہے ہیں۔
انہوں نے بتایا کہ پاکستان بحریہ کی ضروریات کو پورا کرنے کے لیے چار جدید مل گیم کلاس بحری جہازوں کی تیاری کا معاہدہ کیا گیا تھا، جس پر کامیابی سے عمل جاری ہے۔
صدر اردوان کے مطابق پہلا جہاز “بابر” 24 مئی 2024 کو پاکستان کو دیا جا چکا ہے، تیسرا جہاز “بدر” جون 2026 تک اور چوتھا جہاز “طارق” 2027 کی پہلی سہ ماہی میں پاکستان بحریہ کے حوالے کیا جائے گا۔
ترک صدر نے کہا کہ جدید ٹیکنالوجی سے مزین یہ جنگی جہاز پاکستان بحریہ کی صلاحیتوں میں نمایاں اضافہ کریں گے۔
اپنے خطاب کے اختتام پر صدر اردوان نے زور دیا کہ پاکستان اور ترکی کے تعلقات تاریخی، برادرانہ اور ناقابلِ شکست ہیں اور مستقبل میں یہ تعلقات مزید فروغ پائیں گے۔
