امریکی صدر ڈونلڈ ٹرمپ نے سخت مؤقف اختیار کرتے ہوئے کہا ہے کہ اگر ایران نے “پروجیکٹ فریڈم” کے تحت بحری جہازوں کو نشانہ بنانے کا سلسلہ جاری رکھا تو اسے سنگین نتائج بھگتنا ہوں گے، حتیٰ کہ اسے عالمی نقشے سے مٹانے کی دھمکی بھی دی جا سکتی ہے۔
ایک امریکی ٹی وی کو دیے گئے انٹرویو میں ٹرمپ نے کہا کہ ایران نے حالیہ مذاکرات کے دوران نسبتاً لچک دکھائی ہے، تاہم خطے میں کشیدگی برقرار ہے۔ ان کے مطابق امریکا اپنی فوجی تیاریوں کو مسلسل بڑھا رہا ہے اور اس کے پاس جدید ترین ہتھیار، گولہ بارود اور عسکری ساز و سامان موجود ہے۔
انہوں نے کہا کہ امریکا کے دنیا بھر میں قائم فوجی اڈے مکمل طور پر تیار اور ساز و سامان سے لیس ہیں، اور ضرورت پڑنے پر ان وسائل کا استعمال کیا جا سکتا ہے۔
ٹرمپ نے مزید دعویٰ کیا کہ ایران نے بعض غیر متعلقہ ممالک کے بحری جہازوں کو بھی نشانہ بنایا ہے، جن میں جنوبی کوریا کا ایک مال بردار جہاز بھی شامل ہے۔ ان کے مطابق ایسے حالات میں ممکن ہے کہ جنوبی کوریا بھی اس مشن میں شامل ہونے پر غور کرے۔
انہوں نے یہ بھی کہا کہ امریکا نے حال ہی میں چھ سے سات تیز رفتار چھوٹی کشتیوں کو تباہ کیا ہے جنہیں وہ خطرناک سرگرمیوں میں استعمال کر رہے تھے۔ ٹرمپ کے مطابق اس وقت آبنائے ہرمز سے گزرنے والے کسی بڑے بحری جہاز کو نقصان نہیں پہنچا، تاہم صورتحال پر مکمل نظر رکھی جا رہی ہے۔
