آپریشن سندور میں بھارت کی عبرتناک شکست کے بعد وزیراعظم نریندر مودی کی خاموشی نے ملک میں شدید سیاسی طوفان برپا کر دیا ہے۔ اپوزیشن جماعتوں نے مودی سرکار کی مجرمانہ خاموشی کو شدید تنقید کا نشانہ بنایا ہے، جبکہ امریکی صدر کے پاکستان کے حق میں بیانات نے بھارتی حکومت کے لیے مزید خفت پیدا کر دی ہے۔
کانگریس رہنما راہول گاندھی نے مودی پر سخت تنقید کرتے ہوئے کہا کہ نریندر مودی ایک بزدل شخص ہیں جن کے پاس نہ وژن ہے نہ جرات۔ وہ امریکی صدر کے سامنے کھڑے ہونے کی ہمت نہیں رکھتے، اور انہی کے دباؤ پر آپریشن سندور روکا گیا۔
کانگریس کی سینئر رہنما سوپریا شری نیت نے کہا کہ ٹرمپ کے مطابق سات بھارتی طیارے مار گرائے گئے، اور مودی کی خاموشی اس حقیقت کو تسلیم کرنے کے مترادف ہے۔
آپریشن سندور کی ناکامی کے بعد بھارت نے جھوٹی خبروں اور پروپیگنڈے کے ذریعے پاکستان مخالف مہم تیز کر دی ہے۔ کشمیر میڈیا سروس کے مطابق اس مہم کی تازہ مثال کوٹ رادھا کشن میں فائرنگ کے واقعے کے بعد سامنے آئی، جہاں 28 سالہ تاجر شیخ معیز جاں بحق ہوا۔
پولیس نے واضح کیا کہ شیخ معیز کا کسی عسکریت پسند گروہ سے کوئی تعلق نہیں تھا۔ رپورٹس کے مطابق، 2025ء کے وسط تک بھارت میں جھوٹی خبروں کے 1,087 سے زائد واقعات ریکارڈ کیے گئے جن میں سوشل میڈیا کے ذریعے فرقہ وارانہ نفرت اور تشدد کو فروغ دیا گیا۔
